How to install De Paul Rajamudi Online (Unofficial) Android Application?

ഇനി ഈ ആപ്ലിക്കേഷൻ എങ്ങനെ നിങ്ങളുടെ ആൻഡ്രോയ്ഡ് ഫോണിൽ ഇൻസ്റ്റാൾ ചെയ്യാം എന്നു നോക്കാം.
ഈ ആപ്ലിക്കേഷൻ എങ്ങനെ ഡൗൺലോഡ് ചെയ്യണം എന്നറിയാൻ ഈ ലിങ്കിൽ ക്ലിക്ക് ചെയ്യുക http://www.kuzhalvili.com/2013/12/how-to-download-android-application-for-de-paul-rajamudi.html
ആൻഡ്രോയ്ഡ് എന്ന ഭാഷയുടെ അവകാശം ഇന്ന് കൈയ്യടക്കിയിരിക്കുന്നത് ഗൂഗിൾ ആണ്. ഏതൊരു മൊബൈൽ ഫോൺ നിർമ്മാതാക്കൾക്കും ഈ ഭാഷ തികച്ചും സൗജന്യമായി അവരുടെ ഫോണിൽ ഉപയോഗിക്കുകയും സ്വന്തമായി വികസിപ്പിക്കുകയും ചെയ്യാം. (മൈക്രോസോഫ്റ്റിന്റെ വിൻഡോസ് ഉപയോഗിക്കണമെങ്കിൽ പണം മുടക്കണമല്ലോ !). അങ്ങനെയാണ് സാംസങ് , മുതലായ കമ്പനികൾ ആൻഡ്രോയ്ഡ് ഭാഷ അവരുടെ ഫോണുകളിൽ ഉപയോഗിക്കുന്നത്. ഈ കമ്പനികൾ ആൻഡ്രോയ്ഡിൽ സ്വന്തമായ മിനുക്കുപണികൾ നടത്തുന്നത് കൊണ്ട് ഓരോ കമ്പനി ഫോണുകൾ വ്യത്യസ്തമായി തോന്നുകയും ചെയ്യും ! മൊബൈൽ കമ്പനികൾക്ക് മാത്രമല്ല ഈ സൗജന്യം ; ഏതൊരാൾക്കും ആൻഡ്രോയ്ഡ് ഭാഷയിൽ സ്വന്തമായി സൗജന്യ ആപ്ലിക്കേഷനുകൾ നിർമ്മിക്കാൻ ഗൂഗിൾ അനുവാദം നൽകിയിട്ടുണ്ട് .... അങ്ങനെ നിർമ്മിക്കപ്പെട്ടതാണ് "ഡി പോൾ രാജമുടി ഓൺലൈൻ" എന്ന നമ്മുടെ ആപ്ലിക്കേഷനും. ആൻഡ്രോയ്ഡ് ആപ്ലിക്കേഷൻ ഡവലപ്പർമാർ നിർമ്മിക്കുന്ന ഇത്തരം ലക്ഷക്കണക്കിനു ആപ്ലിക്കേഷനുകൾ അപ് ലോഡ് ചെയ്യാനും ഡൗൺലോഡ് ചെയ്യാനുമായി ഗൂഗിൾ തുറന്നിരിക്കുന്ന വെബ്സൈറ്റാണ് "ഗൂഗിൾ പ്ലേ". നിർഭാഗ്യം എന്നു പറയട്ടെ, ഇവിടെ ഡവലപ്പർ അക്കൗണ്ട് തുടങ്ങണമെങ്കിൽ 25 ഡോളർ മുടക്കേണ്ടി വരും.
ഇനി ഞാൻ കാര്യത്തിലേക്ക് വരാം. ഈ ഉയർന്ന ഫീസ് നൽകി ഞാൻ നമ്മുടെ ആപ്ലിക്കേഷൻ ഗൂഗിൾ പ്ലേയിൽ അപ് ലോഡ് ചെയ്താലും നമ്മുടെ നാട്ടിൽ ഇതു എത്ര പേർ സ്വന്തം ആൻഡ്രോയ്ഡ് ഫോണിൽ ഇൻസ്റ്റാൾ ചെയ്യും എന്ന് എനിക്ക് സംശയം ഉള്ളതു കൊണ്ടു ; തൽക്കാലം ഈ ആപ്ലിക്കേഷൻ ഗൂഗിൾ പ്ലേയിൽ ഇടുന്നില്ല. അതുകൊണ്ടാണ് "ഗൂഗിൾ പ്ലേ" യുടെ അതേ ധർമ്മം നിർവ്വഹിക്കുന്ന 'ആൻഡ്രോയ്ഡ്ഫ്രീവെയർ.നെറ്റ്' എന്ന ആധികാരികമായ വെബ്സൈറ്റിൽ ഞാൻ നൽകിയിരിക്കുന്നതു. അവർ ഈ ആപ്ലിക്കേഷൻ 'വെരിഫൈ' ചെയ്യുകയും ചെയ്തു.
ഈ ആപ്ലിക്കേഷൻ നിങ്ങളുടെ ഫോണിലേക്ക് എങ്ങനെ ഡൗൺലോഡ് ചെയ്യാം എന്ന് കഴിഞ്ഞ പാഠത്തിൽ നിന്നും മനസ്സിലാക്കിയല്ലോ. depaulrajamudi110.apk എന്ന ഈ ഫയൽ ആണു ഇൻസ്റ്റാൾ ചെയ്യേണ്ടത്. ഈ ഫയൽ മെമ്മറിയിലെ ഫോൾഡറിൽ നിന്നു കണ്ടെത്തി അതിൽ ക്ലിക്ക് ചെയ്ത് ഇൻസ്റ്റാൾ ചെയ്യുക. അത്രമാത്രം!
പക്ഷേ , ഇവിടെ സംഭവിക്കാവുന്ന ഒരു പ്രശ്നം ... "സുരക്ഷാകാരണങ്ങളാൽ വിശ്വസനീയമല്ലാത്ത (ഗൂഗിൾ പ്ലേയ്ക്ക് പുറത്തുനിന്നുള്ള) ആപ്ലിക്കേഷനുകൾ ഇൻസ്റ്റാൾ ചെയ്യാൻ ഫോൺ സെറ്റിംഗ്സ് മാറ്റുക" എന്ന സന്ദേശം കാണേണ്ടി വരും. ഇതിനു കാരണമെന്താണെന്ന് ആദ്യത്തെ വിശദീകരണങ്ങളിൽ നിന്നും മനസ്സിലായിക്കാണുമല്ലോ. ഇത്തരം സന്ദേശം ലഭിക്കുകയാണെങ്കിൽ നിങ്ങളുടെ ഫോണിന്റെ "സെറ്റിംഗ്സ്" സെലക്ട് ചെയ്യുക. അതിൽ "സെക്യൂരിറ്റി" സെലക്ട് ചെയ്യുക. അവിടെ "unknown source" എന്ന തലക്കെട്ടിനു കീഴിൽ "Allow installation of apps from unknown sources" എന്ന് എഴിതിയതിനു എതിരെ ബോക്സ് ടിക് (ശരി) ചെയ്യുക. (നിങ്ങളുടെ ആൻഡ്രോയ്ഡ് ഫോണിന്റെ വേർഷൻ അനുസരിച്ച് ഈ വിശദീകരണത്തിൽ വ്യത്യാസം വരാം. അതു സ്വയം കണ്ടെത്തുമല്ലോ.)
ഇനി പുറത്ത് കടന്ന് ഫോൺ മെമ്മറിയിൽ നിന്നും depaulrajamudi110.apk എന്ന ഫയൽ കണ്ടെത്തി വീണ്ടും ഇൻസ്റ്റാൾ ചെയ്യുക. മറ്റുള്ള ആപ്ലിക്കേഷന്റെ ഐക്കണുകളോടൊപ്പം 'ഡി പോൾ സ്കൂളിന്റെ' ചിത്രത്തോടു കൂടിയ ഐക്കൺ കാണാവുന്നതാണ്. ഇതിൽ ക്ലിക്ക് ചെയ്ത് ഉപയോഗിക്കുക. ഫോണിൽ ഇന്റർനെറ്റ് പ്രവർത്തിക്കുന്നുണ്ടോ എന്ന് ഉറപ്പുവരുത്തേണ്ടതാണ്. ഇന്റർനെറ്റ് ശരിയായി പ്രവർത്തിക്കുന്നില്ലെങ്കിൽ ഈ ആപ്ലിക്കേഷന്റെ സുപ്രധാന പേജുകൾ പ്രവർത്തിക്കില്ല.
നിങ്ങളുടെ ഫോണിന്റെ സുരക്ഷയിൽ ശ്രദ്ധാലുവാണെങ്കിൽ സെറ്റിംഗ്സിൽ ഒരിക്കൽക്കൂടി കയറി "Allow installation of apps from unknown sources" എന്ന് എഴിതിയതിനു എതിരെ ബോക്സ് ടിക് (ശരി) മാറ്റിക്കളഞ്ഞാൽ നന്നായിരിക്കും.

ഡി പോൾ രാജമുടി ഓൺലൈൻ (unofficial) ആൻഡ്രോയ്ഡ് ആപ്ലിക്കേഷൻ എങ്ങനെ ഡൗൺലോഡ് ചെയ്യാം?

പ്രിയ സുഹൃത്തുക്കളേ.....
ഡി പോൾ സ്കൂളിന്റെ പേരിലുള്ള അനൗദ്യോഗിക ആൻഡ്രോയിഡ് ആപ്ലിക്കേഷൻ ഇപ്പോൾ ആൻഡ്രോയ്ഡ്ഫ്രീവെയർ.നെറ്റ് എന്ന വെബ്സൈറ്റിൽ നിന്ന് ഡൗൺലോഡ് ചെയ്യാവുന്നതാണു.
ആൻഡ്രോയിഡ് ആപ്ലിക്കേഷനുകൾ സൗജന്യമായി ഡൗൺലോഡ് ചെയ്യാനായുള്ള ഒരു വെബ്സൈറ്റാണു ആൻഡ്രോയ്ഡ്ഫ്രീവെയർ.നെറ്റ് . ഇത് ഗൂഗിൾ പ്ലേ പോലെ തന്നെ പ്രവർത്തിക്കുന്നതാണ്. ഇവിടെ ലഭ്യമായ അനേകായിരം ആപ്ലിക്കേഷനുകളോടൊപ്പം നമ്മുടെ ആപ്ലിക്കേഷനും വെരിഫൈ ചെയ്തിരിക്കുന്നു. ഇവിടെ നൽകിയിരിക്കുന്ന ആപ്ലിക്കേഷനുകൾ ഹാനികരമല്ലെന്നും മികച്ചതാണെന്നും അവരുടെ വിദഗ്ദസമിതി പരിശോധിച്ചതിനു ശേഷമാണ് പ്രസിദ്ധീകരിക്കുന്നത്. അതുകൊണ്ട് നിങ്ങൾക്കിത് ധൈര്യമായി ഡൗൺലോഡ് ചെയ്യാം. ഈ ലിങ്കിൽ ക്ലിക്ക് ചെയ്യുക....
http://www.androidfreeware.net/download-de-paul-rajamudi-online.html

ഇതു എങ്ങനെ ഇൻസ്റ്റാൾ ചെയ്യാം എന്ന് ഇനി പറയാം.
1. കമ്പ്യൂട്ടർ ഉപയോഗിച്ചോ ആൻഡ്രോയിഡ് ഫോൺ ഉപയോഗിച്ചോ മേൽപ്പറഞ്ഞ ലിങ്ക് സന്ദർശിക്കുക.
2. ഒരേ സമയം പതിനഞ്ച് വ്യത്യസ്ത ആപ്ലിക്കേഷനുകളുടെ സ്ഥാനം ഈ ആപ്ലിക്കേഷനുപയോഗിച്ച് എങ്ങനെ സാധിക്കാം എന്നു ഇവിടെ വിശദീകരിച്ചിട്ടുണ്ട്.

കമ്പ്യൂട്ടർ ഉപയോഗിച്ചാണെങ്കിൽ :-
3. ഈ പേജിൽ കാണുന്ന "INSTALL APP" എന്ന ബട്ടണിലോ ഡൗൺലോഡ് എന്ന ലിങ്കിലോ ക്ലിക്ക് ചെയ്ത് ഡൗൺലോഡ് പേജിലേക്ക് പോകാവുന്നതാണ്.
4. ഈ ആപ്ലിക്കേഷൻ ഡൗൺലോഡ് ചെയ്യാൻ അവിടെ 3 മാർഗങ്ങൾ പറയുന്നുണ്ട്. ഇതിൽ "Mirror download" ചെയ്യുന്നതാണ് അഭികാമ്യം.
5. "Mirror download" സെക്ഷനിൽ "Download De Paul Rajamudi Online from Android Freeware servers, tested and virus-free." എന്ന് പറഞ്ഞിരിക്കുന്നതു ശ്രദ്ധിച്ചിരിക്കുമല്ലോ. അതിനു താഴെയുള്ള "Mirror download" എന്ന ബട്ടണിൽ ക്ലിക്ക് ചെയ്ത് ആപ്ലിക്കേഷൻ ഡൗൺലോഡ് ചെയ്യാം.
6.ഇങ്ങനെ കമ്പ്യൂട്ടറിലേക്ക് ഡൗൺലോഡ് ചെയ്ത depaulrajamudi110.apk ഫയൽ പെൻഡ്രൈവ് വഴിയോ, മെമ്മറി കാർഡ് വഴിയോ ബ്ലൂടൂത്ത്/വൈഫൈ വഴിയോ നിങ്ങളുടെ ആൻഡ്രോയ്ഡ് ഫോണിലേക്ക് കോപ്പി ചെയ്തതിനു ശേഷം ഇൻസ്ട്ടാൾ ചെയ്യാവുന്നതാണ്.
കമ്പ്യൂട്ടർ ഉപയോഗിച്ചാണെങ്കിൽ :-(രണ്ടാമത്തെ രീതി)
7. Search Google Play എന്ന തലക്കെട്ടോടെ തന്നിരിക്കുന്ന മൂന്നാമത്തെ സെക്ഷനിൽ കാണുന്ന ആൻഡ്രോയ്ഡ് കിറ്റിന്റെ ചിത്രത്തിനു മുകളിൽ ക്ലിക്ക് ചെയ്താൽ 

http://www.4shared.com/mobile/MTByHUXP/depaulrajamudi110.html 

എന്ന ലിങ്കിൽ നിന്നും ഇതേ ഫയൽ ഡൗൺലോഡ് ചെയ്യാം.
കമ്പ്യൂട്ടർ ഉപയോഗിച്ചാണെങ്കിൽ :-(രണ്ടാമത്തെ രീതി)
8. കമ്പ്യൂട്ടർ ഉപയോഗിച്ച് http://www.androidfreeware.net/get-de-paul-rajamudi-ഒnline.html എന്ന സൈറ്റിൽ നിങ്ങൾ ഇപ്പോൾ തന്നെ എത്തിച്ചേർന്നെങ്കിൽ അവിടെ കാണുന്ന ആദ്യത്തെ സൗകര്യമായ "Barcode download" പ്രയോജനപ്പെടുത്താം.
9. ഇതിനു നിങ്ങളുടെ ആൻഡ്രോയ്ഡ് ഫോണിൽ ബാർകോഡ് സ്വയം വായിക്കാനുള്ള ഒരു ആപ്ലിക്കേഷൻ ആവശ്യമാണ്. (ഒരു ആൻഡ്രോയ്ഡ് ഫോണിൽ വളരെ ആവശ്യമുള്ള ഒരു ആപ്ലിക്കേഷനാണ് ഇത്. കാരണം ആൻഡ്രോയ്ഡ് ഫോണുകൾക്കായുള്ള പല വെബ്സൈറ്റുകളിലും ഇത്തരം ബാർകോഡുകൾ നൽകിയിട്ടുണ്ട്.) ഇങ്ങനെ ഒരു ആപ്ലിക്കേഷൻ നിങ്ങളുടെ ഫോണിൽ ഇല്ലെങ്കിൽ ഈ ലിങ്ക് സന്ദർശിച്ച് അത്തരമൊന്ന് ഡൗൺലോഡ് ചെയ്ത് ഇൻസ്റ്റാൾ ചെയ്യാവുന്നതാണ്.
www.androidfreeware.net/mirror/BarcodeScanner3.51b1.apk

10. നിങ്ങളുടെ കമ്പ്യൂട്ടർ സ്ക്രീനിലെ http://www.androidfreeware.net/get-de-paul-rajamudi-ഒnline.html എന്ന പേജിലെ Barcode download എന്ന വിഭാഗത്തിൽ തന്നിരിക്കുന്ന ബാർകോഡ് , നിങ്ങളുടെ ആൻഡ്രോയ്ഡ് ഫോണിലെ ബാർകോഡ് സ്വയം വായിക്കാനുള്ള ആപ്ലിക്കേഷൻ തുറന്ന് കാമറയിലൂടെ വീക്ഷിക്കുക .... വളരെ എളുപ്പം ഫോണിൽ നമ്മുടെ ആപ്ലിക്കേഷൻ ഡൗൺലോഡ് ചെയ്യാനുള്ള ലിങ്ക് ഫോണിൽ തെളിഞ്ഞ് വരും. ഇതിൽ ക്ലിക്ക് ചെയ്ത് ആപ്ലിക്കേഷൻ ഫോണിലേക്ക് നേരിട്ട് ഡൗൺലോഡ് ചെയ്യാവുന്നതാണ്. അങ്ങനെ ആപ്ലിക്കെഷൻ കമ്പ്യൂട്ടറിലേക്ക് ഡൗൺലോഡ് ചെയ്തിട്ട് അതിനുശേഷം ഫോണിലേക്ക് മാറ്റുന്ന കഷ്ടപ്പാട്
ഒഴിവാക്കാം. മാത്രമല്ല ഫോണിൽ ലിങ്ക് ടൈപ്പ് ചെയ്യുന്ന കഷ്ടപ്പാടും ഒഴിവാക്കാം.
ഫോൺ ഉപയോഗിച്ചാണെങ്കിൽ:-
11. ഫോൺ ബ്രൗസറിൽ www.androidfreeware.net/download-de-paul-rajamidi-online.html എന്ന് ടൈപ്പ് ചെയ്ത് സന്ദർശിക്കുക. അവിടെ നിന്ന് ആപ്ലിക്കേഷൻ നേരിട്ട് ഡൗൺലോഡ് ചെയ്യുക.

സച്ചിൻ .... സച്ചിൻ .....(ലേഖനം) - സി.എ. അനീഷ്കുമാർ

എന്റെ ജീവിതത്തിൽ സ്വാധീനം ചെലുത്തിയ പല വ്യക്തികളും ഉണ്ടായിട്ടുണ്ട്. ചിലർ അങ്ങനെയാണു.... നമ്മുടെ വ്യക്തിത്വത്തെപ്പോലും അവർ സ്വാധീനിക്കും. സ്വഭാവ രൂപീകരണത്തിൽ അവർ അറിയാതെ പങ്കാളികളാകും. അതുപോലൊരാളാണു എനിക്ക് മഹാനായ സച്ചിൻ.
ഞാൻ തീരെ ചെറിയ കുട്ടിയായിരുന്നപ്പോൾ നമ്മുടെ നാട്ടിൽ ക്രിക്കറ്റ് അത്ര പ്രശസ്തവും ജനകീയവുമായിരുന്നില്ല. എന്റെ ചേട്ടനാണു എനിക്ക് ക്രിക്കറ്റിന്റെ ബാലപാഠങ്ങൾ പറഞ്ഞു തന്നതു. കളിക്കാനല്ല, കളി എങ്ങനെ ആസ്വദിക്കണമെന്ന് ! എന്താണു റൺസ് , വിക്കറ്റ് , ഓവർ , ഫോർ , സിക്സർ അങ്ങനെയെല്ലാം .... കൂട്ടത്തിലൊന്നും ; സച്ചിൻ. അന്ന് വരെ എനിക്ക് അജ്ഞാതമായിരുന്ന ക്രിക്കറ്റ് ഞാൻ ആസ്വദിച്ചു; സച്ചിനിലൂടെ.
അന്നൊക്കെ ക്രിക്കറ്റ് മറ്റ് വീടുകളിൽ പോയി ആസ്വദിച്ചു. പിന്നീട് വീട്ടിൽ ടിവി എത്തിയപ്പോൾ ഇഷ്ട്ടമുള്ള സിനിമയും സീരിയലും മുടങ്ങുന്നതോർത്ത് എന്റെ അമ്മയും പെങ്ങളും ക്രിക്കറ്റിനെ തള്ളിപ്പറഞ്ഞു. സച്ചിന്റെ കളി കണ്ട് പിന്നെ അവരും ക്രിക്കറ്റിനെ സ്നേഹിച്ചു. സച്ചിന്റെ കളി കാണാൻ വേണ്ടി അവർ ക്രിക്കറ്റ് പഠിച്ചു. സച്ചിനെ അമ്പയർമാർ ഔട്ടാക്കുമ്പോഴും ഫീൽഡർമാർ അദ്ദേഹത്തിന്റെ ബോളുകൾ തടയുമ്പോഴും ആ തീരുമാനങ്ങൾ ശരിയാണെങ്കിൽ കൂടി എന്റെ അമ്മ അവരോട് രോഷം കൊണ്ടു. സച്ചിന്റെ കളി കാണാൻ ഏത് പാതിരാത്രിയിലും അവരും എന്നോടൊപ്പം ഉറക്കം മാറ്റിവച്ചു. സച്ചിൻ ഔട്ടാകുമ്പോൾ അമ്മ പറയും "ഇനി എന്തിനാ ഈ കളി കാണുന്നതു .... ഇതു തോറ്റു ... ടിവി ഓഫ് ചെയ്ത് കിടന്നുറങ്ങാൻ നോക്ക്." (സച്ചിനെക്കുറിച്ച് ഇങ്ങനെയൊക്കെ ഫേസ്ബുക്കിൽ പറയുന്നതു കോപ്പി അടിച്ചതല്ല .... ഇതെല്ലാം എന്റെ അനുഭവം തന്നെ....)
ക്രിക്കറ്റ് ഉള്ള ദിവസം ഞങ്ങൾ കൂട്ടുകാരെല്ലാം ക്ലാസ് കട്ട് ചെയ്യുമെന്ന് ഉറപ്പാണു ... കോളേജിനടുത്ത ഏതെങ്കിലും വീട്ടിൽ അവർക്ക് അലോസരം ഉണ്ടാക്കാതെ ക്രിക്കറ്റ് കാണും .... ഇന്ത്യയുടെ ബൗളിങ്ങാണെങ്കിൽ പിന്നെ വീട്ടിലേക്കുള്ള നിർത്താത്ത ഓട്ടം .... സച്ചിനോടുള്ള സ്നേഹം കിലോമീറ്ററുകൾ നീളമുള്ള റോഡിനു വഴി മാറും. എന്റെ ഹൃദയം ഏറ്റവും തീവ്രവും ശക്തവും ആയി മിടിച്ചിട്ടുള്ളതു സച്ചിന്റെ കളി ആസ്വദിക്കുമ്പോൾ മാത്രമായിരുന്നു. സച്ചിൻ ഔട്ടായാൽ ടീം ഇന്ത്യയെ ആരു രക്ഷിക്കും? ഇതാണു ചങ്കിടിപ്പിനു കാരണം. ക്ലാസിനകത്ത് പോലും ഇടവേളകളിൽ ക്രിക്കറ്റ് കളിക്കാൻ ഞങ്ങളെ പ്രേരിപ്പിച്ചതും ഈ സ്നേഹം തന്നെ.
ഒരു യുദ്ധക്കളത്തിൽ പതിനൊന്ന് പേർക്കിടയിൽ എതിരിടാൻ ഒരാൾ ... ബാറ്റ്സ്മാൻ . ഒരേ ഒരു ബോൾ മതി കളി മാറാൻ. ഇതാണു ക്രിക്കറ്റിന്റെ അനിശ്ചിതത്വവും , സൗന്ദര്യവും , വ്യത്യസ്തതയും , ധീരതയും. അടർക്കളത്തിൽ സച്ചിൻ പോരാടുന്നതു കാണുന്ന നിമിഷങ്ങളിൽ ഞാൻ പേടിച്ചെങ്കിലും ഓരോ യുദ്ധത്തിലും അദ്ദേഹം ജയിക്കുന്നത് കണ്ട് ഞാൻ അതിശയിച്ചു. സ്വന്തം ജീവിതത്തിൽ വിശ്വാസം നഷ്ട്ടപ്പെട്ട് നിരാശയിൽ കഴിയുന്നവർ അദ്ദേഹത്തിന്റെ ഒരു ഇന്നിംഗ്സ് കണ്ടാൽ മതി , ജീവിതത്തിലേക്ക് തിരിച്ച് വരാൻ. സച്ചിൻ ഇല്ലായിരുന്നെങ്കിൽ ഇന്ത്യയിൽ ആരാലും സ്നേഹിക്കപ്പെടാനില്ലാത്ത മണ്ടന്മാരുടെ കളി മാത്രം ആയിരുന്നിരിക്കും ക്രിക്കറ്റ് . അതല്ലെങ്കിൽ ഒത്തുകളിച്ച് രാജ്യത്തെ ഒറ്റിക്കൊടുക്കുന്ന കളിക്കാരാൽ നയിക്കപ്പെടുന്ന ഒരു കളി നടത്താൻ കാശില്ലാതെ പിരിവുനടത്തേണ്ട ഗതികേടിൽ നിൽക്കുന്നത്ര ദരിദ്രമാകുമായിരുന്നു ഇന്റ്യൻ ക്രിക്കറ്റ് സംഘടന (B.C.C.I.)
എന്റെ പ്രിയപ്പെട്ട സച്ചിൻ ... പ്രതിസന്ധികളെ എങ്ങനെ നേരിടാമെന്നു പഠിപ്പിച്ച , വിമർശനങ്ങൾക്ക് എങ്ങനെ മറുപടി പറയാമെന്നു പഠിപ്പിച്ച , നേട്ടങ്ങളിൽ എങ്ങനെ എളിയവനാകാം എന്നു പഠിപ്പിച്ച അങ്ങ് ക്രിക്കറ്റിൽ നിന്ന് വിരമിക്കുമ്പോൾ എനിക്ക് മുൻപിൽ ഒരു ശൂന്യത മാത്രമാണ്  ....
എങ്കിലും ഒന്നു മാത്രം പറയുന്നു... കോടിക്കണക്കിനു ആളുകളുടെ , അവരുടെ അമ്മമാരുടെ പ്രാർഥന അങ്ങേയ്ക്ക് ഒപ്പം എന്നും ഉണ്ടാകും.
അവസാനമായി ഒന്നു കൂടെ പറയട്ടെ ... ഇന്ന് നടക്കുന്നത് ക്രിക്കറ്റിനു വേണ്ടിയുള്ള ക്രിക്കറ്റല്ല ... അതു പണത്തിനു വേണ്ടിയുള്ളത് മാത്രമായി... പണ്ടൊക്കെ 250 മുകളിൽ റൺസ് കേറില്ലായിരുന്നു. പിന്നെയത് 300 ആയി, 350 ആയി 400 ആയി , അങ്ങനെ പോകുന്നു. ഏതു സ്കോറും വിരാട് കോഹ്ലിയും രോഹിത് ശർമ്മയും പിന്തുടർന്ന് ജയിക്കുന്നു. അതു അവരുടെ കഴിവു കൊണ്ട് മാത്രം ആണോ? കാണികളുടെ കയ്യടി വാങ്ങാൻ പിച്ച് പൂർണ്ണമായും ബാറ്റിംഗിന് അനുകൂലമാക്കി മാറ്റുന്നു. ഏകദിനത്തിൽ തന്നെ 800 നു മുകളിൽ റൺസ് ഉയരുന്നു. ബൗളർമാരുടെ ശവപ്പറമ്പായി മാറുന്ന ഇത്തരം പിച്ചുകൾ ക്രിക്കറ്റിനെ നാശത്തിലേക്ക്  നയിക്കും എന്ന് കഴിഞ്ഞ ദിവസം ധോണി പറഞ്ഞതും അതുകൊണ്ട് തന്നെയാണു. ഇതു പോലുള്ള വിക്കറ്റുകളിൽ 100 ഉം 200 ഉം റൺസ് അടിച്ചെന്ന പേരിൽ അവരെ സച്ചിനോട് ഉപമിക്കുന്നത് ശരിയല്ല. അദ്ദേഹം ഷെയ്ന് വോൺ , മക്ഗ്രാത്ത്, ബ്രെറ്റ് ലീ, വസീം അക്രം , മുരളീധരൻ, അക്തർ മുതലായ അതികായന്മാരെ നേരിട്ട അനുഭവമൊന്നും ഇവർക്ക് വരുമെന്നു തോന്നുന്നില്ല. സച്ചിന്റെ റെക്കോർഡുകൾ വിരാട് കോഹ്ലി മറികടക്കും എന്നാണ് ഗവാസ്കർ പറഞ്ഞത് . അതിനു കാലം മറുപടി പറയട്ടെ .... സച്ചിനെയും ഗാംഗുലിയെയും ദ്രാവിഡിനെയും ധോണിയെയും തള്ളി പറഞ്ഞവർ നാളെ വിരാട് കോഹ്ലിയെയും തള്ളിപ്പറയാതിരിക്കില്ല .... എന്നാലും എന്റെ അമ്മ സച്ചിന് വേണ്ടി പ്രാർഥിച്ച പോലെ ഇവർക്കാർക്കും വേണ്ടി പ്രാർഥിക്കും എന്നു തോന്നുന്നില്ല.

അമ്മ മലയാളം (കവിത)-ശ്രീമതി. ബിന്ദു പത്മകുമാർ

മലയാളമേ അമ്മേ മലയാളമേ

നമിക്കുന്നു നിന്നെ ഞാൻ മലയാളമേ

മധുരം മധുരം മധുമയം നീ

നമിക്കുന്നു നിന്നെ ഞാൻ മലയാളമേ

നയനാഭിരാമമാം നിൻ മലർവാടിയിൽ

വിലസിക്കും കുസുമങ്ങൾ കവിത്രയങ്ങൾ

നിറയവ്വനത്തിനൂഷര രക്തമേകി

നിരവദ്യ കാന്തിയേകി നിൻ മണ്ണിൽ

ജി-യുടെയോടക്കുഴലിൽ നിന്നും

സാന്ദ്രസംഗീത ധാരയൊഴുകി

കനകച്ചിലങ്കയണിയിച്ചു ചങ്ങ-

മ്പുഴയുടെ ഭാവഗീതങ്ങളുമെത്തി.

മധുരസംഗീതം താരാട്ടിൽ നിറച്ചു

മയക്കിയുറക്കി-യിരയിമ്മൻ തമ്പി

പാട്ടിലെ പാലാഴിയിടനെഞ്ചിൽ കുറുക്കി

പാലൊളിപ്പുഞ്ചിരി തൂകുന്നു വയലാർ

ഓരോവണുവിലും നിറയുന്നു നിന്റെ

മോഹന ചൈതന്യ വിലാസലഹരി

വിശ്വദർശന ദാഹം തുടിക്കുന്നു

പ്രപഞ്ചമാകെ നിന്നെ സ്തുതിക്കുന്നു.

മഹിമ നിറയുന്നു നിന്നിലമ്മേ

മലയാളമേ നീയെത്ര ധന്യ

അനുഭവവേദ്യം നിൻ നറുസുഗന്ധം

നമിക്കുന്നു നിന്നെ ഞാൻ മലയാളമേ ....

Tags: Malayalam Blog, Malayalam Kavitha, Malayalam Poems,Stories,Short Story,Malayalam Classics

Presented by : ഗുരു @ കുഴല്‍വിളി  

ഏവരുടെയും അഭിപ്രായം ക്ഷണിക്കുന്നു. രണ്ടു രീതിയില്‍ നിങ്ങള്‍ക്ക് കമന്റ്‌ ചെയ്യാം. 
1.) നിങ്ങള്‍ക്ക് ഫേസ് ബുക്ക്‌ അക്കൗണ്ട്‌ ഉണ്ടെങ്കില്‍ ഫേസ് ബുക്ക്‌ കമന്റ് ബോക്സില്‍ കമന്റ് ചെയ്യൂ.
2.) രണ്ടാമത്തെ കമന്റ്‌ ബോക്സില്‍ അഭിപ്രായം രേഖപ്പെടുത്തുന്നതിന് നിങ്ങള്‍ ഈ സൈറ്റിലെ മെമ്പര്‍ ആയിരിക്കണം. 'JOIN THIS SITE with Google friend connect' എന്ന തലക്കെട്ടോടെ വലതു വശത്തെ സൈഡ്ബാറിലെ ബോക്സ്‌ വഴി ഈ സൈറ്റിലെ മെമ്പര്‍ ആയിട്ടുണ്ടെങ്കില്‍ മാത്രമേ ഈ കമന്റ്‌ ബോക്സ്‌ വഴി അഭിപ്രായം രേഖപ്പെടുത്താന്‍ പറ്റുകയുള്ളു.

താഴെ കാണുന്ന Google Transliterate ബോക്സിനുള്ളില്‍ മലയാളത്തില്‍ ടൈപ്പ് ചെയ്യാം. 

(Press Ctrl+g to toggle between English and Malayalam ... കണ്ട്രോള്‍ കീയോടൊപ്പം g എന്ന അക്ഷരം ക്ലിക്ക് ചെയ്ത് മലയാളവും ഇംഗ്ലീഷും മാറി മാറി തെരഞ്ഞെടുക്കാവുന്നതാണ് ).ടൈപ്പ് ചെയ്ത സന്ദേശം പിന്നീട് കോപ്പി ചെയ്ത് ഫേസ് ബുക്ക്‌ കമന്റ് ബോക്സിലോ ബ്ലോഗ്‌ കമന്റ് ബോക്സിലോ പേസ്റ്റ് ചെയ്യുക.

സഹായം ആവശ്യമാണെങ്കില്‍ ഇവിടെ ക്ലിക്ക് ചെയ്യൂ.

മലയാളത്തില്‍ ടൈപ്പ് ചെയ്യാനുതകുന്ന മറ്റൊരു ബോക്സ്‌ തുറന്നുവരാന്‍ ഇവിടെ ക്ലിക്ക് ചെയ്യുക..

കനവിന്റെ കുസൃതി (കഥ) - ശ്രീമതി. ബിന്ദു പത്മകുമാർ

         അന്ന് നല്ല നിലാവുള്ള ഒരു രാത്രിയായിരുന്നു. ആകാശമുറ്റത്ത് നിറയെ നക്ഷത്രപ്പൂക്കൾ പുഞ്ചിരി തൂകി വിടർന്നു നിന്നു. കുന്നിൻ മുകളിൽ നിന്ന് താഴ്വരക്കാഴ്ച്ചകൾ നോക്കിനിൽക്കവെ ഞാനൊരു പഞ്ഞിത്തുണ്ടായി മുകളിലേക്കുയരാൻ തുടങ്ങി. മേഘങ്ങൾക്ക് അടുത്തെത്തവേ ഞാൻ കണ്ടു, അതാ എന്നെപ്പോലെ മറ്റൊരു പഞ്ഞിത്തുണ്ട്. ഭാരമില്ലാതെ പറന്നുയർന്ന് ആകാശവീഥികളിൽ ഞങ്ങൾ കൈകോർത്ത് നീങ്ങി. മഞ്ഞ് മൂടിയ താഴ്വാരത്തിലേക്ക് നോക്കിയപ്പോൾ ഒരു സുന്ദര ചിത്രം കാണാനായി.
       നിറയെ ചിത്രശലഭങ്ങളും വണ്ടുകളും കൊച്ചുകിളികളും പാറിക്കളിക്കുന്നു. പൂമരങ്ങളുടെ ചില്ലകളിൽ വണ്ണാത്തിക്കിളികൾ കൂടുകൂട്ടിയിരിക്കുന്നു. ആ മരങ്ങളിലെ പൂവുകൾക്കെല്ലാം മഞ്ഞനിറം. മഞ്ഞനിറം എനിക്കൊത്തിരി ഇഷ്ടമായിരുന്നില്ല ... ഒരിക്കലും. എന്നിട്ടും ആ കാഴ്ച കണ്ണിൽ നിന്നും മനസ്സിൽ നിന്നും മായുന്നതേ ഇല്ല. അപ്പോഴതാ ഓരോ തളികയിലായി മഞ്ഞപ്പൂക്കൾ മാനത്തേക്ക് പറന്നുയരുന്നു, ഒപ്പം പറവകളും. നിലാവിൽ കുളിച്ചുനിന്ന പ്രകൃതിയിൽ ഞാൻ കണ്ട കാഴ്ച എങ്ങനെ മറക്കാനാവും?
പെട്ടെന്ന് എന്റൊപ്പം ഉണ്ടായിരുന്ന ആ പഞ്ഞിത്തുണ്ടിനെ കാണാതായി. തേടി തേടി ഞാൻ താഴ്വരയിലൂടൊഴുകുന്ന പുഴയോരത്തെത്തി. പുഴയിൽ നിറയെ തെളിനീർ. പുഴയുടെ ഇരുവശങ്ങളിലും സുഗന്ധമേകി നിൽക്കുന്ന കാട്ടുപൂക്കൾ. അവയ്ക്കെല്ലാം പക്ഷേ മഞ്ഞ നിറമായിരുന്നു. വർണ്ണച്ചിറകുകൾ നീർത്തി ഒരു കൂട്ടം ഹംസങ്ങൾ പുഴയിലൂടെ നിരനിരയായി ഒഴുകിയെത്തുന്നു. അതിനു പിറകിലായ് ചങ്ങാടങ്ങളും വഞ്ചികളും. അവയിലൊന്നിലും തുഴകളോ യാത്രക്കാരോ ഇല്ലായിരുന്നു.
            ആരവങ്ങളില്ലാതെ ആ യാത്രയവസാനിക്കുമ്പോൾ എന്റെ മിഴികളിൽ നഷ്ടബോധത്തിന്റെ നനവൂറി. കനവിന്റെ കുസൃതിയായിരുന്നു എന്റെ യാത്രയെന്ന് തിരിച്ചറിയവേ ആലസ്യത്തോടെ ഞാൻ ഉറക്കമുണർന്നു. ജാലക വാതിലിന്റെ വിരി മാറ്റി പുറത്തേക്ക് നോക്കവേ ഞാനിതുവരെ കാണാതിരുന്ന മഞ്ഞപ്പൂക്കൾ ഇതാ ഇളം കാറ്റിലുലഞ്ഞ് എന്നെ നോക്കി പുഞ്ചിരി തൂകുന്നു. എന്നും എന്റെ വീഥികളിൽ, കണ്മുന്നിൽ അവ വിരിഞ്ഞു നിന്നിട്ടും , ഇത്ര നാൾ ആ കാഴ്ച കാണാതെ പോയി, സ്വപ്നങ്ങളിൽ കൈകോർത്ത് നീങ്ങിയ പഞ്ഞിത്തുണ്ടിനെയും.

Tags: Malayalam Blog, Malayalam Kavitha, Malayalam Poems,Stories,Short Story,Malayalam Classics

Presented by : ഗുരു @ കുഴല്‍വിളി  

ഏവരുടെയും അഭിപ്രായം ക്ഷണിക്കുന്നു. രണ്ടു രീതിയില്‍ നിങ്ങള്‍ക്ക് കമന്റ്‌ ചെയ്യാം. 
1.) നിങ്ങള്‍ക്ക് ഫേസ് ബുക്ക്‌ അക്കൗണ്ട്‌ ഉണ്ടെങ്കില്‍ ഫേസ് ബുക്ക്‌ കമന്റ് ബോക്സില്‍ കമന്റ് ചെയ്യൂ.
2.) രണ്ടാമത്തെ കമന്റ്‌ ബോക്സില്‍ അഭിപ്രായം രേഖപ്പെടുത്തുന്നതിന് നിങ്ങള്‍ ഈ സൈറ്റിലെ മെമ്പര്‍ ആയിരിക്കണം. 'JOIN THIS SITE with Google friend connect' എന്ന തലക്കെട്ടോടെ വലതു വശത്തെ സൈഡ്ബാറിലെ ബോക്സ്‌ വഴി ഈ സൈറ്റിലെ മെമ്പര്‍ ആയിട്ടുണ്ടെങ്കില്‍ മാത്രമേ ഈ കമന്റ്‌ ബോക്സ്‌ വഴി അഭിപ്രായം രേഖപ്പെടുത്താന്‍ പറ്റുകയുള്ളു.

താഴെ കാണുന്ന Google Transliterate ബോക്സിനുള്ളില്‍ മലയാളത്തില്‍ ടൈപ്പ് ചെയ്യാം. 

(Press Ctrl+g to toggle between English and Malayalam ... കണ്ട്രോള്‍ കീയോടൊപ്പം g എന്ന അക്ഷരം ക്ലിക്ക് ചെയ്ത് മലയാളവും ഇംഗ്ലീഷും മാറി മാറി തെരഞ്ഞെടുക്കാവുന്നതാണ് ).ടൈപ്പ് ചെയ്ത സന്ദേശം പിന്നീട് കോപ്പി ചെയ്ത് ഫേസ് ബുക്ക്‌ കമന്റ് ബോക്സിലോ ബ്ലോഗ്‌ കമന്റ് ബോക്സിലോ പേസ്റ്റ് ചെയ്യുക.

സഹായം ആവശ്യമാണെങ്കില്‍ ഇവിടെ ക്ലിക്ക് ചെയ്യൂ.

മലയാളത്തില്‍ ടൈപ്പ് ചെയ്യാനുതകുന്ന മറ്റൊരു ബോക്സ്‌ തുറന്നുവരാന്‍ ഇവിടെ ക്ലിക്ക് ചെയ്യുക..

നൊമ്പരപ്പൂവ് (കവിത)-ശ്രീ. റോബിൻ കൊന്നത്തടി

പണ്ടൊരു സിന്ദൂര സന്ധ്യയിലവളെന്റെ
നെഞ്ചിലെ ചൂടേറ്റു മയങ്ങിടുമ്പോൾ
കാച്ചെണ്ണമണമെഴും കാർമുടിതുമ്പിൽ ചൂടിയ
തുളസിക്കതിരിന്റെ നൈർമല്യം
ചോരാതെൻ നെഞ്ചിലെ സ്നേഹ -
കടൽത്തിരയവളെ തഴുകിടുന്നു ..... !

തൂവെണ്ണനിറം തോൽക്കുമാ സുന്ദര -
പൂവുടൽ ചാരുതയിലെൻ വിരൽതുമ്പൊരു
കുസൃതിക്കുരുന്നാകാൻ വെമ്പിടുമ്പോൾ...
കരിമിഴിക്കോണാൽ വിലക്കിടും നിൻ
വലംപിരിശംഖിൻ അഴകൊത്ത കഴുത്തിൽ
പൊൻ താലി ചാർത്തുവാൻ കൊതിച്ചിരുന്നു...!

തങ്കതാമരയിതൾ കോർത്ത പൊൻകിനാവുകൾ
വർണ്ണമയിൽപ്പേടയായ് പീലിനീർത്തിടുമ്പോൾ
പ്ലാവിലപൈങ്കിടാവിനോടൊപ്പം തുള്ളിക്കളിക്കും
തന്നോമനകുരുന്നുകുസുമങ്ങളെ ഓമനിച്ചിരുന്നു...!

വർണ്ണസങ്കൽപ്പങ്ങളിൽ കുളിരാർന്നിരുന്നപ്പോൾ
മറ്റൊരുപൂവിലെ മധുവായുറയുവാനവളെ
ആകാശനീലിമയ്ക്കപ്പുറെ നിന്നാരോ
വിധിച്ചിരുന്നു ....

നീറുന്ന നെഞ്ചുമായ് വേപഥുവോടെ ഞാൻ
ജീവിതത്തോണിയിൽ ഒറ്റയ്ക്കലയുമ്പോൾ
അവൾ നൊമ്പരപ്പൂവായ് കൊഴിഞ്ഞതും ഞാനറിഞ്ഞു..!

മാനത്തു പൊൻ താരകമായവൾ
മിന്നിത്തിളങ്ങുമ്പോൾ
തേങ്ങിത്തളർന്ന ഞാനവളുടെ
ചാരത്തണയുവാൻ കൊതിച്ചിടുന്നു...!!

Tags: Malayalam Blog, Malayalam Kavitha, Malayalam Poems,Stories,Short Story,Malayalam Classics

Presented by : ഗുരു @ കുഴല്‍വിളി  

ഏവരുടെയും അഭിപ്രായം ക്ഷണിക്കുന്നു. രണ്ടു രീതിയില്‍ നിങ്ങള്‍ക്ക് കമന്റ്‌ ചെയ്യാം. 
1.) നിങ്ങള്‍ക്ക് ഫേസ് ബുക്ക്‌ അക്കൗണ്ട്‌ ഉണ്ടെങ്കില്‍ ഫേസ് ബുക്ക്‌ കമന്റ് ബോക്സില്‍ കമന്റ് ചെയ്യൂ.
2.) രണ്ടാമത്തെ കമന്റ്‌ ബോക്സില്‍ അഭിപ്രായം രേഖപ്പെടുത്തുന്നതിന് നിങ്ങള്‍ ഈ സൈറ്റിലെ മെമ്പര്‍ ആയിരിക്കണം. 'JOIN THIS SITE with Google friend connect' എന്ന തലക്കെട്ടോടെ വലതു വശത്തെ സൈഡ്ബാറിലെ ബോക്സ്‌ വഴി ഈ സൈറ്റിലെ മെമ്പര്‍ ആയിട്ടുണ്ടെങ്കില്‍ മാത്രമേ ഈ കമന്റ്‌ ബോക്സ്‌ വഴി അഭിപ്രായം രേഖപ്പെടുത്താന്‍ പറ്റുകയുള്ളു.

താഴെ കാണുന്ന Google Transliterate ബോക്സിനുള്ളില്‍ മലയാളത്തില്‍ ടൈപ്പ് ചെയ്യാം. 

(Press Ctrl+g to toggle between English and Malayalam ... കണ്ട്രോള്‍ കീയോടൊപ്പം g എന്ന അക്ഷരം ക്ലിക്ക് ചെയ്ത് മലയാളവും ഇംഗ്ലീഷും മാറി മാറി തെരഞ്ഞെടുക്കാവുന്നതാണ് ).ടൈപ്പ് ചെയ്ത സന്ദേശം പിന്നീട് കോപ്പി ചെയ്ത് ഫേസ് ബുക്ക്‌ കമന്റ് ബോക്സിലോ ബ്ലോഗ്‌ കമന്റ് ബോക്സിലോ പേസ്റ്റ് ചെയ്യുക.

സഹായം ആവശ്യമാണെങ്കില്‍ ഇവിടെ ക്ലിക്ക് ചെയ്യൂ.

മലയാളത്തില്‍ ടൈപ്പ് ചെയ്യാനുതകുന്ന മറ്റൊരു ബോക്സ്‌ തുറന്നുവരാന്‍ ഇവിടെ ക്ലിക്ക് ചെയ്യുക..

അകലങ്ങളിലേക്ക് (കവിത)-ശ്രീ രാജേഷ് പി.എ.

അകലെ ....
ചക്രവാളത്തിൽ നിന്നും പിശറൻ കാറ്റിരമ്പുന്നു...
മനസ്സിലെ കാർമുകിൽ മെല്ലെയിടറുന്നു
പൊഴിയുന്നു - പെയ്യുന്നു പേമാരി പോലവെ
ഒരു നീർത്തുള്ളി മണ്ണിനെ പുൽകുന്നു
മണ്ണിന്റെ കണ്ണുനീർ ചാലുകൾ തീർക്കുന്നു.
കറുത്ത സൂര്യന്റെ കരാളഹസ്തങ്ങൾ
എയ്യുവാനസ്ത്രമെടുക്കുന്നു...
ബഹുജനം കഴുതയാം രാമന്റെ നാടൊരു
ഭ്രാന്താലയമായിയെന്നോ
വിലപിച്ചു കൂട്ടുന്നു വിവേകനും, പിന്നെ
കരയുന്ന ഗാന്ധിയും ചിരിക്കുന്ന ദുഃഖവും
മണ്ണിനെ പുൽകുന്നു മണ്ണിന്റെ മാറിലടരുന്നു....

Presented by : ഗുരു @ കുഴല്‍വിളി  

ഏവരുടെയും അഭിപ്രായം ക്ഷണിക്കുന്നു. രണ്ടു രീതിയില്‍ നിങ്ങള്‍ക്ക് കമന്റ്‌ ചെയ്യാം. 
1.) നിങ്ങള്‍ക്ക് ഫേസ് ബുക്ക്‌ അക്കൗണ്ട്‌ ഉണ്ടെങ്കില്‍ ഫേസ് ബുക്ക്‌ കമന്റ് ബോക്സില്‍ കമന്റ് ചെയ്യൂ.
2.) രണ്ടാമത്തെ കമന്റ്‌ ബോക്സില്‍ അഭിപ്രായം രേഖപ്പെടുത്തുന്നതിന് നിങ്ങള്‍ ഈ സൈറ്റിലെ മെമ്പര്‍ ആയിരിക്കണം. 'JOIN THIS SITE with Google friend connect' എന്ന തലക്കെട്ടോടെ വലതു വശത്തെ സൈഡ്ബാറിലെ ബോക്സ്‌ വഴി ഈ സൈറ്റിലെ മെമ്പര്‍ ആയിട്ടുണ്ടെങ്കില്‍ മാത്രമേ ഈ കമന്റ്‌ ബോക്സ്‌ വഴി അഭിപ്രായം രേഖപ്പെടുത്താന്‍ പറ്റുകയുള്ളു.

താഴെ കാണുന്ന Google Transliterate ബോക്സിനുള്ളില്‍ മലയാളത്തില്‍ ടൈപ്പ് ചെയ്യാം. 

(Press Ctrl+g to toggle between English and Malayalam ... കണ്ട്രോള്‍ കീയോടൊപ്പം g എന്ന അക്ഷരം ക്ലിക്ക് ചെയ്ത് മലയാളവും ഇംഗ്ലീഷും മാറി മാറി തെരഞ്ഞെടുക്കാവുന്നതാണ് ).ടൈപ്പ് ചെയ്ത സന്ദേശം പിന്നീട് കോപ്പി ചെയ്ത് ഫേസ് ബുക്ക്‌ കമന്റ് ബോക്സിലോ ബ്ലോഗ്‌ കമന്റ് ബോക്സിലോ പേസ്റ്റ് ചെയ്യുക.

സഹായം ആവശ്യമാണെങ്കില്‍ ഇവിടെ ക്ലിക്ക് ചെയ്യൂ.

മലയാളത്തില്‍ ടൈപ്പ് ചെയ്യാനുതകുന്ന മറ്റൊരു ബോക്സ്‌ തുറന്നുവരാന്‍ ഇവിടെ ക്ലിക്ക് ചെയ്യുക..

Find us on Google+

ആത്മശാന്തി (കഥ) - ശ്രീമതി. ബിന്ദു പത്മകുമാർ

 
പള്ളിമണിയുടെ മുഴങ്ങുന്ന ശബ്ദം താരയെ ചിന്തകളിൽ നിന്നുണർത്തി. സായം സന്ധ്യയുടെ പൊൻ ചുവപ്പേറുന്ന പടിഞ്ഞാട്ടേയ്ക്ക് നോക്കി അവൾ ഗദ്ഗദത്തോടെ എഴുന്നേറ്റു നിന്നു. തന്റെ കുമ്പസാരപ്പട്ടികയിലെ എത്രാമത്തെ ദേവാലയമാണിത്. അവൾക്ക് ഓർമ്മിച്ചെടുക്കാനായില്ല. സന്ധ്യാപ്രാർത്ഥനയുടെ അലകൾ അവളുടെ കാതിലെത്തി ..... ഓർമ്മകൾ , അവയുടെ നറും ഗന്ധങ്ങൾ തനിക്ക് നഷ്ടബോധത്തിന്റെ വേദനയിൽ ചാലിച്ച ഒരാശ്വാസമായോടിയെത്തുന്നു.

                 കൊഴിഞ്ഞുണങ്ങിയ ആ വർണ്ണ പുഷ്പങ്ങൾ ഇനിയൊരിക്കലും തന്റെ ജീവിതത്തിൽ വിടരുകയില്ലല്ലോ. "അമ്മ" - അമ്മയുടെ കൈ പിടിച്ചല്ലേ ഞാനാദ്യം പിച്ചവച്ചു നടന്നത്. ഓർമ്മകളിൽ ഒരിക്കൽ പോലും എത്തി നോക്കിയിട്ടില്ലാത്ത അച്ഛന്റെ മുഖം താനൊരിക്കലും കാണാൻ ആഗ്രഹിച്ചിട്ടില്ലായിരുന്നു. കാലത്തിന്റെ മിനുക്കുപണികൾ തന്റെ കൌമാരവും യൗവ്വനവും തീക്ഷ്ണതയേറിയതാക്കിയിരുന്നു. രണ്ടു കിലോമീറ്റർ മാത്രം അകലെയുള്ള സ്വന്തം വീട്ടിൽ നിന്നും കോളേജിൽ  പോയി വരാൻ തനിക്കാവില്ലെന്ന് വാശി പിടിച്ചപ്പോൾ അമ്മ തന്നെ ഹോസ്റ്റലിൽ ചേർത്തു. ഒപ്പമുള്ളവരുടെ അടിച്ചുപൊളി ജീവിതം തന്നിൽ വലിയ മാറ്റങ്ങൾ വരുത്തി. കോളേജ് ഫീസിനും ഹോസ്റ്റൽ ഫീസിനും തന്റെ മാറിവരുന്ന ഫാഷൻ ഭ്രമങ്ങൾക്കുമിടയിൽ നിന്ന് നട്ടം തിരിയുന്ന ഒരു പാവത്തിനെ താൻ നടിക്കുകയായിരുന്നുവോ? തനിക്കു വേണ്ടി മാത്രം വരിഞ്ഞുമുറുക്കി ചുരുക്കിയ ആ ചുക്കിച്ചുളുങ്ങിയ വയറും താൻ കണ്ടിരുന്നില്ലല്ലോ.

    "ഗൾഫിൽ നിന്ന് മാസം തോറും വരുന്ന ഡാഡിയുടെ ഡ്രാഫ്റ്റ് " എന്ന തന്റെ അഹങ്കാര വാക്കുകൾ - അവ വെറും പോള്ളയാണെന്നറിയാത്ത കൂട്ടുകാർക്കിടയിൽ തന്നെയൊരു വീര നായികയാക്കി. കോളേജിലെ എല്ലാ പെണ്‍കുട്ടികളുടെയും സ്വപ്നനായകനായിരുന്ന സുധീഷ്‌ എത്ര വേഗമാണ് തന്റെ സൌന്ദര്യത്തിലും ഇല്ലാത്ത സമ്പത്തിലും മയങ്ങിവീണത്‌ !! സുധിയുടെ പഞ്ചാരവാക്കുകൾ തന്റെ എല്ലാ ക്ലാസ്സുകളും മുടക്കി. കാമ്പസിലെ അക്കേഷ്യകളും അരയാൽക്കൂട്ടങ്ങളും എല്ലാത്തിനും മൂക സാക്ഷികളായി നിന്നിരുന്നു.

               അന്നൊരു വെള്ളിയാഴ്ചയായിരുന്നു. ഹോസ്റ്റലിൽ നിന്നിറങ്ങി സുധിയോടൊപ്പം അവന്റെ കാറിൽ അവനോടു ചേർന്നിരുന്ന് ടൌണിലെ സ്ഥിരം താവളത്തിലേക്കൊരു യാത്ര. സ്റ്റിയറിംഗ് വീലിൽ താളം പിടിക്കുന്ന സുധി ഇടതു കൈ കൊണ്ട് തന്നെ ചേർത്തു പിടിച്ചിരുന്നു. മുന്നിലെ വാഹനങ്ങളുടെ നീണ്ട നിര ട്രാഫിക്‌ ബ്ലോക്കിന്റെ സാമീപ്യം വിളിച്ചറിയിച്ചിരുന്നു. കാറിന്റെ ചില്ല് താഴ്ത്തി പുറത്തേക്കുള്ള കാഴ്ചകൾ നോക്കി വെറുതേയിരിക്കവേ  പെട്ടെന്ന് സുധി തന്നെ വരിഞ്ഞു മുറുക്കാൻ തുടങ്ങി.

പെട്ടെന്നാണ് ആ വിളി കേട്ടത് ....

മോളേ .... എന്റെ മോളേ ...... എന്നുറക്കെ വിളിച്ചു കൊണ്ട് ഓടിവരുന്ന തന്റെയമ്മ. അപരിചിതനായ ഒരു പുരുഷന്റെയൊപ്പം തന്റെ മകളെ അവർ ഒരിക്കലും പ്രതീക്ഷിച്ചിരുന്നില്ല. സുധിയുടെ കടന്നു കയറ്റം അമ്മ വ്യക്തമായും കണ്ടിരുന്നു. പാറിപ്പറന്ന അനുസരണയില്ലാത്ത മുടിയും നിറം മങ്ങിയ സാരിയും ധരിച്ച ആ സ്ത്രീ തന്റെയമ്മയാണെന്നു പറയാൻ ദുരഭിമാനം സമ്മതിച്ചില്ല. അടുത്ത വീട്ടിലെ അടുക്കളപ്പണിക്കുള്ള കൂലിയാണ് തന്റെ ജീവൻ നിലനിർത്തിയിരുന്നതെന്നു സുധി അറിയുമ്പോഴുള്ള പ്രതികരണം ഊഹിക്കാനായില്ല. കയ്യിൽ ഒരു പ്ലാസ്റ്റിക് കവറുമായി അമ്മ എതിർവശത്തു നിന്നും ഓടി വരുന്നു. ഒന്നും മിണ്ടാനാവാതെ , ചലിക്കാനാവാതെ താൻ മരവിച്ചിരുന്നപ്പോൾ ട്രാഫിക് സിഗ്നൽ കിട്ടിയതും , സുധി കാർ മുന്നോട്ടെടുത്തതും താനറിഞ്ഞില്ലല്ലോ .......

എന്റെ മോളേ ........

എന്ന വിളിക്കൊപ്പം റോഡിൽ ചിതറിത്തെറിച്ച ചോരപ്പൂക്കൾക്കിടയിൽ തനിക്കായ് വാങ്ങിയ ഏറ്റവും പുതിയ ഫാഷൻ ചുരിദാർ മറ്റൊരു കൊഴിഞ്ഞ പൂവായ് തെറിച്ചു കിടന്നിരുന്നു. അപ്പോഴും ചുക്കിച്ചുളിഞ്ഞ ആ വയർ വരിഞ്ഞു മുറുക്കിയിരുന്നു.

ഇരുട്ടിന്റെ കനത്ത കരിമ്പടം തനിക്കു ചുറ്റും വലയം തീർത്തത് താരയറിഞ്ഞില്ല. ഓർമ്മകളുടെ ചെപ്പിൽ നിന്ന് കിലുങ്ങുന്ന മണിമുഴക്കം അവളുടെ കാലുകളുടെ വേഗത വർദ്ധിപ്പിച്ചു. അടുത്ത യാത്രയുടെ അവസാനം എവിടെയായിരിക്കും എന്നോർക്കവേ മിന്നിമറഞ്ഞ ഒരു തീക്ഷ്ണതയേറിയ വെളിച്ചം.

"അമ്മേ ...... "

അവൾ അലറി വിളിച്ചു. തന്റെ പാപ ബോധത്തിന്റെ കൂരിരുട്ടിൽ നിന്നും പശ്ചാത്താപത്തിന്റെ ചുവന്നു തിണർത്ത സങ്കട നുറുങ്ങുകൾ പാപപരിഹാരത്തിന്റെ ചോരപ്പൂക്കളായ് വീണ്ടും ആ റോഡിൽ ചിതറിത്തെറിച്ചു. ഇനി താരയ്ക്ക് ആത്മശാന്തി ലഭിക്കാതിരിക്കുമോ?

Presented by : ഗുരു @ കുഴല്‍വിളി  

ഏവരുടെയും അഭിപ്രായം ക്ഷണിക്കുന്നു. രണ്ടു രീതിയില്‍ നിങ്ങള്‍ക്ക് കമന്റ്‌ ചെയ്യാം. 
1.) നിങ്ങള്‍ക്ക് ഫേസ് ബുക്ക്‌ അക്കൗണ്ട്‌ ഉണ്ടെങ്കില്‍ ഫേസ് ബുക്ക്‌ കമന്റ് ബോക്സില്‍ കമന്റ് ചെയ്യൂ.
2.) രണ്ടാമത്തെ കമന്റ്‌ ബോക്സില്‍ അഭിപ്രായം രേഖപ്പെടുത്തുന്നതിന് നിങ്ങള്‍ ഈ സൈറ്റിലെ മെമ്പര്‍ ആയിരിക്കണം. 'JOIN THIS SITE with Google friend connect' എന്ന തലക്കെട്ടോടെ വലതു വശത്തെ സൈഡ്ബാറിലെ ബോക്സ്‌ വഴി ഈ സൈറ്റിലെ മെമ്പര്‍ ആയിട്ടുണ്ടെങ്കില്‍ മാത്രമേ ഈ കമന്റ്‌ ബോക്സ്‌ വഴി അഭിപ്രായം രേഖപ്പെടുത്താന്‍ പറ്റുകയുള്ളു.

താഴെ കാണുന്ന Google Transliterate ബോക്സിനുള്ളില്‍ മലയാളത്തില്‍ ടൈപ്പ് ചെയ്യാം. 

(Press Ctrl+g to toggle between English and Malayalam ... കണ്ട്രോള്‍ കീയോടൊപ്പം g എന്ന അക്ഷരം ക്ലിക്ക് ചെയ്ത് മലയാളവും ഇംഗ്ലീഷും മാറി മാറി തെരഞ്ഞെടുക്കാവുന്നതാണ് ).ടൈപ്പ് ചെയ്ത സന്ദേശം പിന്നീട് കോപ്പി ചെയ്ത് ഫേസ് ബുക്ക്‌ കമന്റ് ബോക്സിലോ ബ്ലോഗ്‌ കമന്റ് ബോക്സിലോ പേസ്റ്റ് ചെയ്യുക.

സഹായം ആവശ്യമാണെങ്കില്‍ ഇവിടെ ക്ലിക്ക് ചെയ്യൂ.

മലയാളത്തില്‍ ടൈപ്പ് ചെയ്യാനുതകുന്ന മറ്റൊരു ബോക്സ്‌ തുറന്നുവരാന്‍ ഇവിടെ ക്ലിക്ക് ചെയ്യുക..

Find us on Google+

ഒരു മധുരക്കിനാവ് (കവിത) - ശ്രീ. റോബിൻ കൊന്നത്തടി

മഴ പെയ്തു തോർന്നൊരാ നേരത്തെൻ
കിനാവിന്റെ വാതിൽക്കൽ
പ്രണയത്തിൻ കുളിരുമായ് നീ വന്നു നില്ക്കെ .....
ഈറനാം മഞ്ഞിന്റെ ചുണ്ടിലെ
പുഞ്ചിരി നാണത്തിൽ കുതിർന്നു നിന്നു ....!

നിൻ കവിൾപ്പൂവിനെയെൻ നഖമുനകളാൽ
നോവാതെ ഞാനൊന്നു നുള്ളിയപ്പോൾ ......
പൂത്തൊരാ ലജ്ജയിൽ .....
പാതി കൂമ്പിയ മിഴികളിൽ .....
പൂക്കളൊരായിരം വിടർന്നുവല്ലോ ...!

നിന്നധരത്തിലെ കുങ്കുമച്ചോപ്പിനെ
ഞാനെൻ ഹൃത്തിനാൽ പടർത്തിയപ്പോൾ ...
മറ്റാർക്കും കാനുവാനാവാതെ
എന്നെ പോതിഞ്ഞയാ കാർകൂന്തൽ തുമ്പിലെ
ഈറൻ നനവെന്നെ തൊട്ടുണർത്തി .....!

മങ്ങിയകന്നൊരാ സുന്ദരസ്വപ്നത്തെ
ഇടനെഞ്ചു നീറ്റുമാ വേദനയ്ക്കിടയിലും
പിന്നെയും പിന്നെയും ഞാൻ താലോലിച്ചീടവേ ...
ചാരുതയാർന്നൊരാ കുളിർ പിന്നെയും
സുഖമുള്ള നോവിൻ പുഞ്ചിരിയായി
വന്നെൻ ചുണ്ടിൽ മെല്ലെ വിടർന്നുവല്ലോ ....!

Presented by : ഗുരു @ കുഴല്‍വിളി  

ഏവരുടെയും അഭിപ്രായം ക്ഷണിക്കുന്നു. രണ്ടു രീതിയില്‍ നിങ്ങള്‍ക്ക് കമന്റ്‌ ചെയ്യാം. 
1.) നിങ്ങള്‍ക്ക് ഫേസ് ബുക്ക്‌ അക്കൗണ്ട്‌ ഉണ്ടെങ്കില്‍ ഫേസ് ബുക്ക്‌ കമന്റ് ബോക്സില്‍ കമന്റ് ചെയ്യൂ.
2.) രണ്ടാമത്തെ കമന്റ്‌ ബോക്സില്‍ അഭിപ്രായം രേഖപ്പെടുത്തുന്നതിന് നിങ്ങള്‍ ഈ സൈറ്റിലെ മെമ്പര്‍ ആയിരിക്കണം. 'JOIN THIS SITE with Google friend connect' എന്ന തലക്കെട്ടോടെ വലതു വശത്തെ സൈഡ്ബാറിലെ ബോക്സ്‌ വഴി ഈ സൈറ്റിലെ മെമ്പര്‍ ആയിട്ടുണ്ടെങ്കില്‍ മാത്രമേ ഈ കമന്റ്‌ ബോക്സ്‌ വഴി അഭിപ്രായം രേഖപ്പെടുത്താന്‍ പറ്റുകയുള്ളു.

താഴെ കാണുന്ന Google Transliterate ബോക്സിനുള്ളില്‍ മലയാളത്തില്‍ ടൈപ്പ് ചെയ്യാം. 

(Press Ctrl+g to toggle between English and Malayalam ... കണ്ട്രോള്‍ കീയോടൊപ്പം g എന്ന അക്ഷരം ക്ലിക്ക് ചെയ്ത് മലയാളവും ഇംഗ്ലീഷും മാറി മാറി തെരഞ്ഞെടുക്കാവുന്നതാണ് ).ടൈപ്പ് ചെയ്ത സന്ദേശം പിന്നീട് കോപ്പി ചെയ്ത് ഫേസ് ബുക്ക്‌ കമന്റ് ബോക്സിലോ ബ്ലോഗ്‌ കമന്റ് ബോക്സിലോ പേസ്റ്റ് ചെയ്യുക.

സഹായം ആവശ്യമാണെങ്കില്‍ ഇവിടെ ക്ലിക്ക് ചെയ്യൂ.

മലയാളത്തില്‍ ടൈപ്പ് ചെയ്യാനുതകുന്ന മറ്റൊരു ബോക്സ്‌ തുറന്നുവരാന്‍ ഇവിടെ ക്ലിക്ക് ചെയ്യുക..

മലയാളമേ വന്ദനം -(ലേഖനം) ശ്രീമതി ബിന്ദു പത്മകുമാർ

( മലയാളത്തിനു ശ്രേഷ്ഠ ഭാഷാപദവി ലഭിച്ചതിനോടനുബന്ധിച്ചു പ്രസിദ്ധീകരിക്കുന്ന ലേഖനം.)

'മലയാളം' എന്ന മധുരമായ പദം കേൾക്കുമ്പോൾ തന്നെ ഓരോ മലയാളിയുടെയും മനസ്സിൽ നവ്യാനുഭൂതി നിറയുന്നു. മഹിമ നിറഞ്ഞ ഈ മലയാളത്തോളം ശ്രേഷ്ഠത വേറേതു ഭാഷയ്ക്കാണ് കല്പ്പിച്ചു നൽകേണ്ടത്? ! മലയാളം നമ്മുടെ പെറ്റമ്മയാണ്. പെറ്റമ്മയെ സ്നേഹിക്കുന്ന ഓരോരുത്തരും മലയാളത്തെയും സ്നേഹിക്കുന്നു. അതുകൊണ്ടു തന്നെ മലയാളത്തിന്റെ മഹത്വം വിവരണാതീതവുമാണ്.
നോവൽ, പ്രബന്ധങ്ങൾ, ചെറുകഥ, വിമർശനങ്ങൾ, ജീവചരിത്രം, ആത്മകഥാരചന, ഹാസ്യസാഹിത്യം, സഞ്ചാരകഥകൾ എന്ന് വേണ്ട ; മലയാളികൾക്ക് അറിവിന്റെ അക്ഷയ ഖനികൾ ആവോളം പകർന്നു കൊടുക്കുന്ന വിജ്ഞാന ശാഖകൾ നമ്മുടെ ഗദ്യ സാഹിത്യത്തിൽ ധാരാളമുണ്ട്. സാഹിത്യാസ്വാദകന്മാരുടെയും സാഹിത്യ നിർമ്മാതാക്കളുടെയും എണ്ണം അനുദിനം വർദ്ധിച്ചു വരുന്ന ഇക്കാലത്ത് നമ്മുടെ ഗദ്യസാഹിത്യം മനസ്സിനിണങ്ങും വിധം രൂപഭംഗികൊണ്ട് സ്വച്ഛന്ദം വളരുകയും പുരോഗമിക്കുകയും ചെയ്യുന്നു. അവയെല്ലാം തന്നെ വിശ്വസാഹിത്യങ്ങളോടൊപ്പം നിൽക്കത്തക്ക വിധം വികാസം പ്രാപിച്ചിരിക്കുന്നു. നൂറ്റാണ്ടുകളായി നമ്മുടെ മുൻതലമുറക്കാർ അനുഷ്ഠിച്ചു പോന്ന സേവനത്തിന്റെ പരിശുദ്ധി കൈവിട്ടുകളയാതെ ഇന്നത്തെ യുവതലമുറയും സാഹിത്യ സൃഷ്ടികൾ നടത്തുന്നതിനായി പരിശ്രമിക്കുന്നു. എത്രയോ കാലമായി കൈരളിയുടെ വളർച്ച, ഇന്നും അഭംഗുരം തുടർന്നു കൊണ്ടേയിരിക്കുന്നു.
മലയാളത്തിന് ആധുനികത്വം കല്പിച്ചുതന്ന മഹാപ്രതിഭകളെ വിസ്മരിക്കാൻ ഒരു മലയാളിക്കും കഴിയില്ല. ഘനഗംഭീര ശൈലിയിൽ - ചരിത്രത്തിന്റെ ഏടുകളിൽ വ്യക്തിമുദ്ര പതിപ്പിച്ച ചരിത്രകാരന്മാരെയും നാടുവാഴികളെയും വീരാരാധനാമനോഭാവത്തോടെ നമുക്കു മുമ്പിൽ അവതരിപ്പിച്ച സി. വി. , അസാമാന്യ സർഗ്ഗ ചൈതന്യം കൊണ്ട് ധന്യമായ പ്രതിഭാ വിലാസത്തിന്റെ മാസ്മരികത നമുക്കു മുമ്പിൽ പ്രദർശിപ്പിച്ച ചന്തുമേനോൻ, എന്നിവർ തുടങ്ങി അതുല്യ പ്രതിഭകളായ തകഴി , പൊറ്റക്കാട് , വൈക്കം മുഹമ്മദ്‌ ബഷീർ , പി. സി. കുട്ടികൃഷ്ണൻ , മുണ്ടശ്ശേരി , ചെറുകാട് , നന്തനാർ , പൊൻകുന്നം വർക്കി , കാരൂർ , നാഗവള്ളി , ലളിതാംബിക അന്തർജ്ജനം എന്നീ അസാമാന്യ പ്രതിഭകളെ കൈരളിക്ക് വിസ്മരിക്കാനാവുമോ?
മലയാളത്തിന്റെ മാധുര്യം തൊട്ടറിഞ്ഞ മഹാകവികൾ കൈരളിക്കു സമ്മാനിച്ച വിലയേറിയ കാവ്യ രത്നങ്ങൾ നമ്മുടെ മാത്രം മുതൽക്കൂട്ടാണ്. മലയാളത്തിന്റെതായ മണവും രുചിയും ശക്തിയും ശാലീനതയും നിറച്ച് , മലയാള ഭാഷാശബ്ദങ്ങൾക്കും ദ്രാവിഡ വൃത്തത്തിനും അനവദ്യ മധുരമുണ്ടെന്ന് തെളിയിച്ച മഹാകവി ചെറുശ്ശേരി , മലയാളത്തിന്റെ കാവ്യ സിരകളിൽ നിറ യൗവ്വനത്തിന്റെ ചുടുരക്തം പകർന്ന് നിരവദ്യ കാന്തി പ്രസരിപ്പിച്ച തുഞ്ചത്ത് രാമാനുജനെഴുത്തച്ഛൻ , ശബ്ദവും അർത്ഥവും രൂപവും ഭാവവും ഒത്തിണങ്ങിയ ചൈതന്യയുക്തമായൊരു കലാശില്പം - കുചേലവൃത്തം വഞ്ചിപ്പാട്ട് - അണിയിച്ചൊരുക്കിയ രാമപുരത്തുവാര്യർ , ഹൃദയം തുളച്ചു കയറുന്ന പരിഹാസശരം , പൊട്ടിച്ചിരിപ്പിക്കുന്ന ഫലിതം എന്നീ ആയുധങ്ങളുമായി ജീർണ്ണിച്ച സാമൂഹികാചാരങ്ങളോടും ദുഷ് പ്രവണതകളോടും അങ്കം വെട്ടി മലയാള കവിതയെ സാധാരണക്കാരിലേക്ക് കൂടുതൽ അടുപ്പിച്ച ജനകീയ കവി കുഞ്ചൻ നമ്പ്യാർ എന്നിവർ മലയാളത്തിനു പകർന്നു തന്നത് ജീവാമൃതമാണ്.
ആശയ ഗാംഭീര്യത്തിന്റെ മുടിചൂടാമന്നനായ , സാമൂഹിക വിപ്ലവകാരിയായ കുമാരനാശാൻ , മാതൃഭാഷാഭിമാനിയായ വള്ളത്തോൾ , 'പൌരാണികത്വമെൻ പൈതൃകസ്വത്തെ' ന്നു കരുതിയ ഉള്ളൂർ എന്നീ ത്രിമൂർത്തികൾ കൈരളിയെ പുളകാങ്കുരങ്ങളണിയിച്ചു. മഹാകാവ്യങ്ങളും ഖണ്ഡകാവ്യങ്ങളും ലഘുകവനങ്ങളും മലയാളത്തിന്റെ മലർവാടിയിൽ വിരിഞ്ഞു പൊന്തി. കെട്ടിലും മട്ടിലും കൈരളി നയനാഭിരാമമായി. അവർ തെളിയിച്ച വഴിയിലൂടെ കുറ്റിപ്പുറത്ത്‌ കേശവൻ നായർ , നാലപ്പാട്ട് നാരായണ മേനോൻ , വി. സി. ബാലകൃഷ്ണപ്പണിക്കർ , ജി. ശങ്കരക്കുറുപ്പ് തുടങ്ങിയവർ മലയാളത്തെ നയിച്ചു. മായികമായ സംഗീതാംശം നിറച്ച് , കൈരളിയെ കനകച്ചിലങ്കയണിയിച്ച ചങ്ങമ്പുഴ , സുമധുരങ്ങളായ ഭാവഗീതങ്ങളുടെ തുഷാരഹാരം ചാർത്തിച്ച ഇടപ്പള്ളി എന്നിവർ മലയാള കാവ്യവേദിയിലെ മഹാത്ഭുതങ്ങളായ് മാറി. സ്വതന്ത്ര ഭാരതത്തിന്റെ പുലരിത്തുടുപ്പ് കണ്ട് ആഹ്ലാദചിത്തനായി നമ്മെ ആ നവീനാനന്ദ സ്വർഗ്ഗത്തിലേക്ക് നയിച്ച മഹാകവി ജി. ശങ്കരക്കുറുപ്പ് ; മലയാള കവിതയുടെ മഹാസിദ്ധികളെ വിശ്വചക്രവാളങ്ങളിൽ ഓടക്കുഴലിൽ നിന്നു നിർഗ്ഗളിക്കുന്ന സാന്ദ്രസംഗീത ധാരയിലൂടെ ശാശ്വതമായി ആലേഖനം ചെയ്ത് കീർത്തിമാനായിത്തീർന്നു.
ആധുനികമായ കാല്പനികതകളിലൂടെ സാഹിത്യ സൃഷ്ടി നടത്തിയ പി. കുഞ്ഞിരാമൻ നായർ ; ശൈശവം - ബാല്യം - കൌമാരം - മാതൃത്വം എന്നീ ജീവനാവസ്ഥകളെ സ്വാനുഭൂതിയുടെ ചൂടു കൊടുത്തു ചിത്രീകരിച്ച മലയാളത്തിന്റെ സ്വന്തം ബാലാമണിയമ്മ എന്നിവരുടെ സംഭാവനകൾ മലയാളത്തിനു നൽകിയത് വിലയേറിയ പവിഴ മുത്തുകളാണ്. ഓരോ മലയാളിയുടെയും നെഞ്ചിൽ പാട്ടിന്റെ പാലാഴി തീർത്ത് ഇനിയുളള ജന്മങ്ങളിലെല്ലാം ഈ മനോഹര തീരത്ത് തന്നെ ജീവിക്കുവാനാശിച്ച മഹാനായ വയലാർ , താരാട്ടു പാട്ടിന്റെ മധുര സംഗീതം കൊണ്ട് നമ്മെ മയക്കിയ ഇരയിമ്മൻ തമ്പി .... ഇവരെയെല്ലാം മറക്കുവാൻ മലയാളത്തിനു കഴിയുമോ?
മലയാളസാഹിത്യരംഗത്തുടനീളം നമുക്ക് കാണാം - വിശ്വദർശനത്തിലുള്ള അദമ്യമായ അന്തർദാഹം. പ്രപഞ്ചത്തിലെ പരമാണു മുതൽ മഹാപർവ്വതം വരെയുള്ള എല്ലാ വസ്തുക്കളിലും സൌന്ദര്യം കണ്ടെത്താനുള്ള സൂക്ഷ്മദൃഷ്ടിയും ചെങ്കതിരുകളും സൂര്യകാന്തിപ്പൂക്കളും പൂജാപുഷ്പങ്ങളും മേഘഛായകളും അവയിൽ ഒഴുകി നീങ്ങുന്ന പറവകളും , തരുലതാദികളും , പുഴയുടെ കൊഞ്ചലും കാറ്റിന്റെ തലോടലും എല്ലാം ജീവ ചൈതന്യത്തിന്റെ തുടർക്കണ്ണികളായിക്കണ്ട് ചിത്രീകരിക്കാനുള്ള വിലാസ ലഹരിയും ഇന്ന് മലയാളികൾക്കെന്നല്ല ; ഭാരതീയർക്കു മുഴുവൻ , ഈ ലോകത്തിനാകെത്തന്നെ അനുഭവവേദ്യമായിത്തീർന്നിരിക്കുന്നു.
ഇതിൽപരം മഹനീയമായ ഭാഷ വേറെയേതുണ്ട് ? മലയാളത്തിനൊപ്പം മലയാളം മാത്രം. അമ്മേ മലയാളമേ ... നീയെത്ര ധന്യ ! നമിക്കുന്നു ഞാൻ നിന്നെ നമിക്കുന്നു.
***********************************************************

എന്റെ മലയാളമേ .... നിന്റെ മഹത്വം ലോകം മുഴുവൻ വ്യാപിക്കട്ടെ ......മലയാളത്തിനു ശ്രേഷ്ഠഭാഷ പദവി (Classical Language) നൽകാനുള്ള ശ്രമങ്ങൾക്ക് വർഷങ്ങളുടെ പഴക്കം ഉണ്ട്. മലയാളത്തിനു ശ്രേഷ്ഠഭാഷാ പദവിക്കായി കേരളത്തിൽ കഴിഞ്ഞ സർക്കാരിന്റെ കാലത്ത് മുഖ്യമന്ത്രിയായിരുന്ന ശ്രീ വി. എസ്. അച്യുതാനന്ദനും പ്രതിപക്ഷ നേതാവ് ശ്രീ ഉമ്മൻ ചാണ്ടിയും ഉൾപ്പെട്ട സംഘം ഒരുമിച്ചെത്തിയാണ് കേന്ദ്രസർക്കാരിന് നിവേദനം നല്കിയത്. എന്നാൽ കേന്ദ്രസാഹിത്യ അക്കാദമി നിയോഗിച്ച ഉപസമിതി കേരളത്തിന്റെ വാദം പരിഗണിക്കാതെ ശുപാർശ തള്ളിയിരുന്നു. ഇതിനെതിരെ ഉമ്മൻ‌ചാണ്ടി സർക്കാർ പ്രധാനമന്ത്രിക്ക് നിവേദനം നല്കിയതിനെ തുടർന്നാണ്‌ പുതിയ സമിതി രൂപീകരിക്കുകയും അനുകൂലമായ തീരുമാനമുണ്ടാകുകയും ചെയ്തത്.
മലയാളത്തിനു ശ്രേഷ്ഠഭാഷാ പദവി നൽകാനുള്ള നിർദ്ദേശം കേന്ദ്രമന്ത്രിസഭ അംഗീകരിച്ചതായി കേന്ദ്ര ധനമന്ത്രി പി. ചിദംബരം അറിയിച്ചു. ദക്ഷിണേന്ത്യയിൽ തമിഴിനാണ് ആദ്യം ശ്രേഷ്ഠഭാഷാ പദവി ലഭിച്ചത്. പിന്നീട് തെലുങ്കിനും കന്നടയ്ക്കും ഈ പദവി നൽകിയിരുന്നു.
ശ്രേഷ്ഠഭാഷാ പദവി ലഭിച്ചതിനാൽ ഭാഷാവികസനത്തിനും ഗവേഷണത്തിനുമായി 100 കോടിയോളം രൂപ കേന്ദ്രം കേരളത്തിനു നൽകും. ശ്രേഷ്ഠ ഭാഷാ പഠനത്തിനായി മികവിന്റെ കേന്ദ്രം ആരംഭിക്കാനും കേന്ദ്ര സഹായമുണ്ടാകും. സർവ്വകലാശാലകളിൽ മലയാളം ചെയർ സ്ഥാപിക്കാൻ കേന്ദ്രം യു. ജി. സി. ക്ക് നിർദ്ദേശം നൽകും. കേന്ദ്ര സർവ്വകലാശാലകളിൽ ഇതിനു തുടക്കമിടും. ഇക്കാര്യങ്ങൾക്കായി കേന്ദ്രം ബജറ്റിൽ തുക വകയിരുത്തും. 

Presented by : ഗുരു @ കുഴല്‍വിളി  

ഏവരുടെയും അഭിപ്രായം ക്ഷണിക്കുന്നു. രണ്ടു രീതിയില്‍ നിങ്ങള്‍ക്ക് കമന്റ്‌ ചെയ്യാം. 
1.) നിങ്ങള്‍ക്ക് ഫേസ് ബുക്ക്‌ അക്കൗണ്ട്‌ ഉണ്ടെങ്കില്‍ ഫേസ് ബുക്ക്‌ കമന്റ് ബോക്സില്‍ കമന്റ് ചെയ്യൂ.
2.) രണ്ടാമത്തെ കമന്റ്‌ ബോക്സില്‍ അഭിപ്രായം രേഖപ്പെടുത്തുന്നതിന് നിങ്ങള്‍ ഈ സൈറ്റിലെ മെമ്പര്‍ ആയിരിക്കണം. 'JOIN THIS SITE with Google friend connect' എന്ന തലക്കെട്ടോടെ വലതു വശത്തെ സൈഡ്ബാറിലെ ബോക്സ്‌ വഴി ഈ സൈറ്റിലെ മെമ്പര്‍ ആയിട്ടുണ്ടെങ്കില്‍ മാത്രമേ ഈ കമന്റ്‌ ബോക്സ്‌ വഴി അഭിപ്രായം രേഖപ്പെടുത്താന്‍ പറ്റുകയുള്ളു.

താഴെ കാണുന്ന Google Transliterate ബോക്സിനുള്ളില്‍ മലയാളത്തില്‍ ടൈപ്പ് ചെയ്യാം. 

(Press Ctrl+g to toggle between English and Malayalam ... കണ്ട്രോള്‍ കീയോടൊപ്പം g എന്ന അക്ഷരം ക്ലിക്ക് ചെയ്ത് മലയാളവും ഇംഗ്ലീഷും മാറി മാറി തെരഞ്ഞെടുക്കാവുന്നതാണ് ).ടൈപ്പ് ചെയ്ത സന്ദേശം പിന്നീട് കോപ്പി ചെയ്ത് ഫേസ് ബുക്ക്‌ കമന്റ് ബോക്സിലോ ബ്ലോഗ്‌ കമന്റ് ബോക്സിലോ പേസ്റ്റ് ചെയ്യുക.

സഹായം ആവശ്യമാണെങ്കില്‍ ഇവിടെ ക്ലിക്ക് ചെയ്യൂ.

മലയാളത്തില്‍ ടൈപ്പ് ചെയ്യാനുതകുന്ന മറ്റൊരു ബോക്സ്‌ തുറന്നുവരാന്‍ ഇവിടെ ക്ലിക്ക് ചെയ്യുക..

നിര്‍വൃതി (ചെറുകഥ) - ശ്രീമതി. ബിന്ദു പത്മകുമാര്‍

          ആശുപത്രി കെട്ടിടത്തിനുള്ളിലെ ഒ. പി. വിഭാഗത്തില്‍ ഡോക്ടറെ കാണാനുള്ള ഊഴവും കാത്ത് അക്ഷമയോടെ റീന ഇരുന്നു. പുറത്ത് മഴ കനക്കുന്നു. അതിരാവിലെ തുടങ്ങിയ മഴ, ഇനിയും പെയ്തൊഴിഞ്ഞിട്ടില്ല. നിമിഷങ്ങള്‍ കൊഴിയുന്തോറും മഴയുടെ ശക്തിയും വര്‍ദ്ധിക്കുന്നു. പ്രകൃതി അവളുടെ രൗദ്ര ഭാവത്തിലാണ്. അടിച്ചമര്‍ത്തപ്പെട്ട സര്‍വ്വംസഹയായ അവള്‍ക്ക് പ്രതികരണ ശേഷിയുണ്ടെന്ന് വിളിച്ചോതുകയാണ്.

നീണ്ട ചാരുബഞ്ചുകളിലെല്ലാം തന്നെ രോഗികളും തുണക്കാരും സ്ഥാനം പിടിച്ചിരിക്കുന്നു. തന്നെപ്പോലെ തന്നെ അതിരാവിലെയെത്തി സീറ്റ് ഉറപ്പിച്ചവര്‍ ... ആര്‍ക്കായിരിക്കും ആദ്യത്തെ ഊഴം? എന്തായാലും എനിക്കല്ല; അവള്‍ മനസ്സിലോര്‍ത്തു. തനിക്കു മുമ്പേ മൂന്നാലു പേര്‍ എത്തിയിരുന്നല്ലോ! താന്‍ ഒരു രോഗിയാണോ? അതോ തുണക്കാരിയോ? അവള്‍ സ്വയം ചോദിച്ചു. ഉത്തരം തനിക്കുമറിയില്ല.

ചാരുബഞ്ചിന്റെ ഒരരികിലായ് കൂനിയിരിക്കുന്ന ക്ഷീണിത രൂപത്തെ മനപ്പൂര്‍വ്വം നോക്കാതിരുന്നു.ഇടനാഴിയിലെ ഭിത്തിയില്‍ നിറഞ്ഞു നില്‍ക്കുന്ന ഒരു പിഞ്ചു പൈതലിന്റെ കോമള രൂപം. ഗൈനക്കോളജിസ്റ്റ് ഡോ. ഷൈനി കുര്യന്‍ തൊട്ടടുത്ത് പീഡിയാട്രീഷന്‍ ഡോ. വത്സല കുമാരി. കൂടുതല്‍ ബോര്‍ഡുകള്‍ വായിക്കാന്‍ തോന്നിയില്ല. ആ കോമള രൂപത്തില്‍ നിന്ന് കണ്ണ് എടുക്കാനേ തോന്നിയില്ല. പൂ പോലുള്ള മുഖത്ത് വിരിയുന്ന പാല്‍ പുഞ്ചിരി. തേന്‍ ചുണ്ടുകള്‍ അല്‍പ്പം പിളര്‍ത്തി അമ്മയ്ക്ക് നല്‍കുന്നു നറു ചുംബനം.നിര്‍വൃതിയില്‍ അലിഞ്ഞു തീരുന്ന ആ അമ്മ എത്രയോ ഭാഗ്യവതി. അവളുടെ ജന്മം സഫലമായിരിക്കുന്നു.

തന്റെ ജന്മം ഇനി എന്ന് സഫലമായിത്തീരും? അവനെ വാരിയെടുത്ത് നെഞ്ചോട്‌ ചേര്‍ക്കാന്‍ അവളുടെ മാറിടം ത്രസിച്ചു. മാതൃ വാത്സല്യത്തിന്റെ മധുനുകര്‍ന്ന് ജീവിതം പൂര്‍ത്തീകരിക്കാന്‍ അവള്‍ വെമ്പി. പക്ഷെ എല്ലാം ദൈവത്തിന്റെ തീരുമാനങ്ങള്‍ .

താനും ഇതുപോലെ ഒരു പൈതലായിരുന്നുവല്ലോ എന്ന് റീന ഓര്‍ത്തു. തന്റെ ചുംബനത്തില്‍ സായൂജ്യമടഞ്ഞ ഒരമ്മ തനിക്കുമുണ്ടായിരുന്നു. ഉണ്ടെന്നു കരുതുവാന്‍ മനസ്സനുവദിക്കുന്നില്ല. പതിയെ മുഖം തിരിച്ച് അരികിലിരിക്കുന്ന അമ്മയെ നോക്കി. ആ മുഖത്തെ ദീനത കരളലിയിക്കുന്നുവെങ്കിലും കണ്ടില്ലെന്നു നടിക്കാന്‍ അവള്‍ പഠിച്ചു കഴിഞ്ഞു.

 ഓര്‍മ്മകളുടെ മാറാലകള്‍ തുടച്ചു നീക്കി സുന്ദരമായ കുടുംബത്തിന്റെ തിരുമുറ്റത്ത് അവള്‍ ചെന്ന് നിന്നു. വിശാലമായ പാടശേഖരങ്ങള്‍ക്ക് നടുവില്‍ പ്രൗഢിയോടെ തലയുയര്‍ത്തി നില്‍ക്കുന്ന തൈക്കാട്ട് തറവാട്. അവിടെ അച്ഛനും അമ്മയും മുത്തച്ഛനും മുത്തശ്ശിയും അമ്മാവന്മാരും അമ്മായിമാരും മക്കളും ഒക്കെയുള്ള കൂട്ടുകുടുംബം. കുടുംബത്തിലെ ഏക സര്‍ക്കാര്‍ സേവകനായിരുന്ന പപ്പ. ആക്സിഡന്റില്‍പെട്ട് പപ്പ ഒരോര്‍മ്മ മാത്രമായി ശേഷിക്കുമ്പോള്‍ തനിക്കഞ്ചു വയസ്സ്. തറവാട്ടിലേക്ക് പുതുതായെത്തിയ അതിഥി, അനിയത്തി റീമയ്ക്ക് നാലുമാസം പ്രായം. പപ്പയുടെ വേര്‍പാടില്‍ തകര്‍ന്നു പോയി , തറവാട്ടിലെല്ലാവരും. രണ്ടാഴ്ച തികയും മുമ്പേ അമ്മയുടെ സഹോദരന്മാരെത്തി അവരുടെ തറവാട്ടിലേക്ക് അമ്മയെ കൊണ്ടുപോയി. കുട്ടികളെ കൂടെ കൂട്ടാന്‍ അവര്‍ ഒരുക്കമായിരുന്നില്ല. അവരുടെ സുന്ദരിയായ സഹോദരിക്ക് പുതിയൊരു ജീവിതം കിട്ടാന്‍ ആ കുരുന്നുകള്‍ ഒരു തടസ്സമാകുമെന്ന് അവര്‍ മുന്‍കൂട്ടി കണ്ടിരിക്കും. സഹോദരങ്ങള്‍ക്കൊപ്പം ദൂരേക്ക് നടന്നകന്ന അമ്മയെ നോക്കി നടുമുറ്റത്ത് നിറമിഴികളോടെ നില്‍ക്കുന്ന ആ അഞ്ചു വയസ്സുകാരിയുടെ ഓര്‍മ്മകള്‍ക്ക് ഇപ്പോഴും മങ്ങലേറ്റിട്ടില്ല.

പിന്നെ എല്ലാവര്‍ക്കുമിടയില്‍ ആരുമില്ലാത്തവരെപ്പോലെ, സമ്പന്നതയുടെ നടുവില്‍ തീര്‍ത്തും ദരിദ്രരായി താനും അനിയത്തിയും... അമ്മയുടെ മുലപ്പാലിന്റെ മണം അവളുടെ ചുണ്ടില്‍ ഒരോര്‍മ്മയായ് പോലും ശേഷിക്കുന്നില്ല എന്ന് ഓരോ നിമിഷവും താന്‍ തിരിച്ചറിഞ്ഞു. പടിയിറങ്ങി ദൂരേക്ക്‌ നടന്നുനീങ്ങിയ അമ്മ ഒരിക്കല്‍ പോലും തിരിച്ചു വന്നില്ല. അമ്മയെ കാണാന്‍ കൊതിച്ച് എത്രയോ രാത്രികളില്‍ ഉറങ്ങാതെ, കരഞ്ഞ് തളര്‍ന്ന് താനിരുന്നു! പേടിസ്വപ്നങ്ങള്‍ ജീവിതത്തിന്റെ ഭാഗമായിത്തീര്‍ന്നിരുന്നു. ഏറെ വൈകാതൊരുനാള്‍ കേട്ടറിഞ്ഞു ; തന്റെ അമ്മയുടെ പുനര്‍വിവാഹം കഴിഞ്ഞുവെന്നും , പുതിയ ഭര്‍ത്താവിനൊപ്പം അവര്‍ വിദേശത്തേക്ക് പറന്നുവെന്നും. ഒരിക്കല്‍ പോലും ഒന്ന് വിളിക്കാന്‍ അമ്മ ശ്രമിച്ചിരുന്നില്ലല്ലോ. അതോ ..... 

ഒടുവിലിതാ, ജീവിതപ്പാതയിലൂടെ അനസ്യൂതം യാത്ര തുടര്‍ന്ന്‍ കഥാവശേഷരായവരുടെ ഓര്‍മ്മകളും പേറി താനും അനിയത്തിയും കുടുംബിനികളായി. അമ്മാവന്മാരുടെ കനിവ് കൊണ്ട് വിദ്യാഭ്യാസം പൂര്‍ത്തിയാക്കാനും നല്ലൊരു ജോലി നേടാനും കഴിഞ്ഞത് തന്റെ പപ്പയുടെ പുണ്യമെന്ന് ഓരോ നിമിഷവും കരുതുന്നു. വിവാഹ ശേഷം അനിയത്തി റീമ ഭര്‍ത്താവിനൊപ്പം വിദേശത്തേക്ക് തിരിച്ചു. ഒരു കുഞ്ഞിക്കാല്‍ കാണാനുള്ള ആഗ്രഹവും പേറി താനും ഭര്‍ത്താവും ഇവിടെ. ജീവിതത്തിന് ഒരു ലക്ഷ്യവുമില്ലാതെ, താള മേളങ്ങളില്ലാതെ, വര്‍ണ്ണ ഭാവങ്ങളില്ലാതെ ....
ശൂന്യമായ മനസ്സോടെ നിര്‍വ്വികാരയായിരിക്കെ ഒരു നാള്‍ ഒരു ഫോണ്‍ കോള്‍ . "മോളേ" ഇടറിയ ആ സ്വരം തിരിച്ചറിയാന്‍ തനിക്കായില്ല....
"മോളേ ... ഇത് ഞാനാണ് , ബീനാമ്മ .... നിന്റെ അമ്മ.എനിക്കിനിയും വയ്യ മോളെ ..... ഞാന്‍ വീണ്ടും ഒറ്റയ്ക്കായി. എനിക്ക് നിങ്ങളെ കാണണം. ഞാന്‍ നിന്റരികിലേക്ക് വന്നോട്ടെ? "
ഒന്നും മിണ്ടാനാവാതെ തരിച്ചു നിന്നപ്പോള്‍ വര്‍ഷങ്ങള്‍ക്ക് മുന്‍പ് കണ്ണീരോടെ ദൂരേക്ക് നോക്കി നിന്ന ആ അഞ്ചു വയസ്സുകാരി നെഞ്ചു പൊട്ടിക്കരയുന്നത് വീണ്ടും കേള്‍ക്കാനായി.
കുറച്ചു നാളുകള്‍ക്ക് ശേഷം വീട്ടുപടിക്കല്‍ 'അമ്മ' എന്ന സ്ത്രീരൂപമെത്തി. സൌന്ദര്യം വറ്റി ശോഷിച്ച ശരീരവും നിര്‍ജ്ജീവമായ മിഴികളുമായി ഒരാള്‍ രൂപം. രണ്ടാം ഭര്‍ത്താവിന്റെ മരണശേഷം വീണ്ടും ഒറ്റയായ അവര്‍ക്ക് മുന്നില്‍ മക്കളുടെ ഓര്‍മ്മകള്‍ കടന്നു വന്നത് സ്വാഭാവികം മാത്രം. പക്ഷേ ... വിവരമറിഞ്ഞിട്ടും ഒരിക്കല്‍ പോലും റീമയെത്തിയില്ല ; വിളിച്ചതുമില്ല. അവള്‍ പറഞ്ഞു : - "ഞാന്‍ അമ്മയില്ലാത്ത കുട്ടിയാണ്... "അമ്മ" എന്തെന്ന് എനിക്കറിയില്ല... ഇനിയെനിക്ക് അറിയുകയും വേണ്ട".
പക്ഷെ .... റീന എന്ന ആ അഞ്ചു വയസ്സുകാരിയുടെ കുരുന്നോര്‍മ്മകളില്‍ പണ്ടെങ്ങോ അനുഭവിച്ച അമ്മയുടെ ഇത്തിരി സ്നേഹത്തുണ്ടുകള്‍ ഇന്നും മായാതെ കിടന്നിരുന്നു.
എങ്കിലുമവള്‍ ഒരു വാക്കുപോലും അവരോട് മിണ്ടിയില്ല. സുഖമാണോ എന്നന്ന്വേഷിച്ചില്ല. "അമ്മേ" യെന്ന് ഒരിക്കല്‍ പോലും വിളിച്ചില്ല. പക്ഷെ അവളവരെ ശുശ്രൂഷിച്ചു. ഡോക്ടറെ കാണിക്കുന്നു ... സമയാ സമയങ്ങളില്‍ ഭക്ഷണവും മരുന്നും നല്‍കുന്നു. അപ്പോഴൊക്കെ അവളുടെ ഓര്‍മ്മകള്‍ക്കും പ്രായത്തിനും അഞ്ചു വയസ്സിന്റെ പരിമിതി അവള്‍ തന്നെ നല്‍കിയിരുന്നു. ചിലപ്പോഴൊക്കെ പരിധി വിട്ട് പുറത്ത് പോയിരുന്ന മനസ്സിനെ പാടുപെട്ട് അടക്കി നിര്‍ത്തി.
ബീനാ ജോര്‍ജ് നേഴ്സിന്റെ നീട്ടിയുള്ള വിളി കേട്ട് അവള്‍ ഓര്‍മ്മകളെ മടക്കി വിളിച്ചു. അമ്മയെ കൂട്ടി ഡോക്ടറുടെ മുറിയിലെത്തി രോഗവിവരങ്ങള്‍ വിശദമായി പറഞ്ഞു കേള്‍പ്പിച്ചു. പതിവ് പരിശോധനകള്‍ക്ക് ശേഷം ഡോക്ടര്‍ പറഞ്ഞു -
"ഇവരുടെ ശരീരം ഒരുവിധം ആരോഗ്യം നേടിയിരിക്കുന്നു.ഇനി അമ്മയ്ക്ക് വേണ്ടത് ഒരു കൊച്ചു കുഞ്ഞിനു കൊടുക്കേണ്ട ശ്രദ്ധയും സ്നേഹവുമാണ്. നോക്കൂ റീന ... നീയൊരു നേഴ്സല്ലേ? ഒന്നും പറഞ്ഞു തരേണ്ട എന്ന് എനിക്കറിയാം.സ്നേഹവും ശ്രദ്ധയും പരിഗണനയും നല്‍കിയാല്‍ അമ്മയെ പഴയ ആളാക്കി വേഗം നമുക്ക് മാറ്റിയെടുക്കാം."
കണ്‍സള്‍ട്ടിംഗ് റൂമില്‍ നിന്നും പുറത്തിറങ്ങവേ റീനയുടെ കണ്ണുകള്‍ ഭിത്തിയിലെ ചിത്രത്തില്‍ വീണ്ടുമുടക്കി. നറുചുംബനത്തിനായി ചുണ്ടു പിളര്‍ന്നു നില്‍ക്കുന്ന കുരുന്നിനപ്പോള്‍ ബീനാമ്മയുടെ മുഖമായിരുന്നു. നിര്‍വൃതിയിലലിഞ്ഞു നില്‍ക്കുന്ന ആ അമ്മയ്ക്ക് റീനയുടെ മുഖവും. അവള്‍ അമ്മയെ തന്നോട് ചേര്‍ത്ത് നിര്‍ത്തി. ഇനിയൊരിക്കലും ആര്‍ക്കും വിട്ടുകൊടുക്കില്ല എന്ന ഭാവമായിരുന്നു അവള്‍ക്ക്. പുറത്തപ്പോള്‍ മഴയുടെ ശക്തി കുറഞ്ഞിരുന്നു. പ്രകൃതി ശാന്തമാവുകയായിരുന്നു.
 

Presented by : ഗുരു @ കുഴല്‍വിളി  

ഏവരുടെയും അഭിപ്രായം ക്ഷണിക്കുന്നു. രണ്ടു രീതിയില്‍ നിങ്ങള്‍ക്ക് കമന്റ്‌ ചെയ്യാം. 
1.) നിങ്ങള്‍ക്ക് ഫേസ് ബുക്ക്‌ അക്കൗണ്ട്‌ ഉണ്ടെങ്കില്‍ ഫേസ് ബുക്ക്‌ കമന്റ് ബോക്സില്‍ കമന്റ് ചെയ്യൂ.
2.) രണ്ടാമത്തെ കമന്റ്‌ ബോക്സില്‍ അഭിപ്രായം രേഖപ്പെടുത്തുന്നതിന് നിങ്ങള്‍ ഈ സൈറ്റിലെ മെമ്പര്‍ ആയിരിക്കണം. 'JOIN THIS SITE with Google friend connect' എന്ന തലക്കെട്ടോടെ വലതു വശത്തെ സൈഡ്ബാറിലെ ബോക്സ്‌ വഴി ഈ സൈറ്റിലെ മെമ്പര്‍ ആയിട്ടുണ്ടെങ്കില്‍ മാത്രമേ ഈ കമന്റ്‌ ബോക്സ്‌ വഴി അഭിപ്രായം രേഖപ്പെടുത്താന്‍ പറ്റുകയുള്ളു.

താഴെ കാണുന്ന Google Transliterate ബോക്സിനുള്ളില്‍ മലയാളത്തില്‍ ടൈപ്പ് ചെയ്യാം. 

(Press Ctrl+g to toggle between English and Malayalam ... കണ്ട്രോള്‍ കീയോടൊപ്പം g എന്ന അക്ഷരം ക്ലിക്ക് ചെയ്ത് മലയാളവും ഇംഗ്ലീഷും മാറി മാറി തെരഞ്ഞെടുക്കാവുന്നതാണ് ).ടൈപ്പ് ചെയ്ത സന്ദേശം പിന്നീട് കോപ്പി ചെയ്ത് ഫേസ് ബുക്ക്‌ കമന്റ് ബോക്സിലോ ബ്ലോഗ്‌ കമന്റ് ബോക്സിലോ പേസ്റ്റ് ചെയ്യുക.

സഹായം ആവശ്യമാണെങ്കില്‍ ഇവിടെ ക്ലിക്ക് ചെയ്യൂ.

മലയാളത്തില്‍ ടൈപ്പ് ചെയ്യാനുതകുന്ന മറ്റൊരു ബോക്സ്‌ തുറന്നുവരാന്‍ ഇവിടെ ക്ലിക്ക് ചെയ്യുക..