നിഴല് തേടി - കവിത - - ശ്രീമതി. ബിന്ദു പത്മകുമാര്
ഡി. പോള് . പബ്ലിക് സ്കൂള്
സ്മൃതിതന് നിഴല് വീണ മണിമുറ്റം തേടി
ഒരിക്കല് കൂടി ഞാന് നടന്നു നീങ്ങി
വിജനമാം വീഥിയില് , വിദൂരമാം കാഴ്ചയില്
വിലോലയായങ്ങനെ നടന്നു നീങ്ങി
രാക്കിളി തേങ്ങല് കേട്ടു രാവിന്റെ മാറില്
രാഗങ്ങളെല്ലാം മറന്ന പോലെ
രാക്കുയില് പാട്ടു കേട്ടു ; ആതിരരാവില്
രാജമല്ലിച്ചെടി തന്നിലച്ചാര്ത്തില്
ഇലകള് കൊഴിഞ്ഞോരാ വാകപ്പൂ മരച്ചോട്ടില്
വെറുതെ ഞാനങ്ങനെ നിന്ന നേരം
കാല്യം പോല് മോഹനം ബാല്യമെന്നോര്ക്കവേ
കാതര മിഴികളില് നീര് നിറഞ്ഞു
ഇറ്റിറ്റു വീണൊരാ കണ്ണുനീര് തുള്ളിയില്
പൊന്നിന് കിനാക്കള് ഞാന് കണ്ടറിഞ്ഞു
മുറ്റത്തെ മന്ദാരമാദ്യമായ് പൂത്തനാള്
പുഷ്പിണിയായതാണെന് കിനാവും
പൂമരം പൂത്തതും , പൂവിളി കേട്ടതും
പൂത്തുമ്പി പാറീതും , പുന്നാരം ചൊല്ലീതും
മാനത്തെ മഴവില്ലിന് വര്ണങ്ങള് തേടീതും
പൊയ്പോയ ജന്മത്തിലെന്ന പോലെ
പുസ്തക താളിന്നുള്ളില് മറ്റാരും കാണാതെ -
യൊളിപ്പിച്ചു വെച്ചൊരാ മയില്പീലിതുണ്ടിനെ
നെഞ്ചോട് ചേര്ക്കവേ ഞാനറിയുന്നു
നഷ്ട വസന്തങ്ങളെത്രയെന്നു
കടലാസു തോണിയേറി കാലമാം പുഴയുടെ -
യക്കരെക്കടവിലിന്നേകയായ് നില്ക്കവേ
ഇടവഴിക്കോണിലെ പവിഴമല്ലികള്
ഒരിക്കല്കൂടി പൂക്കുവാനാശിച്ചുപോയി
മറവിതന് ചെപ്പിലടച്ച കിനാക്കള് തന്
കനിവാര്ന്ന കഥനങ്ങളിനിയെത്ര ബാക്കി
പുലര്കാല മഞ്ജിമ വിടരും പനിനീരില്
മുങ്ങിക്കുളിച്ചിനി ഞാന് മടങ്ങിടട്ടെ
Presented by: ഗുരു @ കുഴല്വിളി
സന്ദര്ശിക്കൂ :
No comments:
Post a Comment